شمالی وزیرستان اور اٹک میں تیل اور گیس کے اہم ذخائر دریافت ہوئے ہیں۔
تفصیلات کے مطابق ماڑی انرجیز لمیٹڈ نے شمالی وزیرستان میں تیل اور گیس کے ذخائر کی دریافت کا اعلان کیا ہے۔
ماڑی انرجیز کے اعلامیے کے مطابق ابتدائی تخمینے کے تحت یہاں سے یومیہ 2 کروڑ 4 لاکھ مکعب فٹ گیس اور 117 بیرل خام تیل حاصل ہونے کی امید ہے۔
دوسری جانب، اٹک کے سوغری نارتھ-1 کنویں میں بھی گیس اور کنڈینسیٹ آئل کے ذخائر دریافت ہوئے ہیں۔
او جی ڈی سی ایل کے ترجمان کے مطابق، سوغری نارتھ-1 کنویں کی کھدائی 21 مئی 2024 کو شروع ہوئی تھی اور 4942 میٹر کی گہرائی پر ہائیڈروکاربن کے ذخائر کا انکشاف ہوا۔
ترجمان کا مزید کہنا تھا کہ ابتدائی طور پر یہاں سے یومیہ 1 کروڑ 39 لاکھ مکعب فٹ گیس اور 430 بیرل خام تیل حاصل کیا جاسکتا ہے۔
او جی ڈی سی ایل کے مطابق، سوغری ایکسپلوریشن لائسنس میں کمپنی کا 100 فیصد ورکنگ انٹرسٹ ہے، یہ نئی دریافت ہائیڈروکاربن کے ذخائر میں اضافہ کرے گی اور توانائی کے بحران میں کمی لانے میں مددگار ثابت ہوگی۔
