وفاقی وزیر خزانہ محمد اورنگزیب کی جانب سے پاکستان بینکنگ سمٹ سے خطاب کے دوران کہا گیا کہ حکومت کاروبار چلانے کے حوالے سے نجی شعبے کو پالیسیاں دے۔
پاکستان بینکس ایسوسی ایشن کے تحت پہلی پاکستان بینکنگ سمٹ 2025 جاری ہے، جس میں وزیرخزانہ و سینیٹر محمد اورنگزیب سمیت بینکوں کے صدور اور غیر ملکی مندوبین شریک ہیں۔
وزیر خزانہ کا کہنا ہے کہ ایمرجنگ مارکیٹ نے گزشتہ 25 سال بہترین انداز میں گزارے ہیں، سب کا اتفاق ہے کہ ہمارے جو ہاتھ میں ہے اس پر توجہ دینے کی ضرورت ہے۔
محمد اورنگزیب کا کہنا ہے کہ بیشتر وزرائے خزانہ کی توجہ پیداواری نمو پر مبنی رہی ہے، حکومت کو چاہیئے کہ وہ نجی شعبے کو پالیسیاں دے تاکہ نجی شعبہ کاروبار چلائے، نجکاری کا عمل اور مالیاتی انتظام کی بہتری ہونا ضروری ہے۔
وزیرخزانہ کا کہنا ہے کہ گورنر اسٹیٹ بینک اور میں سعودی عرب میں عالمی کانفرنس میں تھے، میں نے سیکھا کہ ابھرتی منڈیوں نے 2025 میں بہتری کے ساتھ قدم رکھا ہے، ابھرتی منڈیوں کے وزرائے خزانہ نے ڈی-ریگولیشن کے فروغ اور سرخ فیتے کے خاتمے کی بات کی۔
وزیر خزانہ کا کہنا ہے کہ ابھرتی معیشتوں کے مشترکہ تعاون اور تکنیکی معاونت کی بات ہوئی، عالمی تجارت سے زیادہ خطے کی تجارت پر توجہ مرکوز کرنے کی ضرورت ہے، پی آئی اے کو نجکاری کے لیے دوبارہ مارکیٹ میں لائیں گے۔
محمد اورنگزیب نے کہا کہ پاکستان کا چیلنج انفرادی نوعیت کا نہیں ہے باقی ابھرتی معیشتوں کو بھی یہ چیلنجز درپیش ہیں۔
