مشہور جرمن ہدایتکار مشیل نے بالی وڈ کے سپر اسٹار سلمان خان کے ساتھ کام کے دوران پیش آنے والے ناخوشگوار تجربے کا انکشاف کرتے ہوئے ان کے پیشہ ورانہ رویے پر سوال اٹھا دیا۔
بھارتی میڈیا رپورٹس کے مطابق غیر ملکی ڈائریکٹر مشیل، سلمان خان سمیت متعدد بھارتی فلم پروڈیوسرز اور اداکاروں کے ساتھ کام کرچکی ہیں اور انہوں نے اپنے کیریئر کے 10 سال بھارت میں گزارے ہیں۔
ڈائریکٹر مشیل نے ایک دستاویزی فلم میں سلمان خان کے ساتھ کام کرنے کا تجربہ شیئر کرتے ہوئے کہا کہ میں نے کئی مشہور شخصیات کے ساتھ کام کیا، جن میں سے کچھ کی پیشہ ورانہ مہارت سوالیہ نشان ہے۔ سلمان خان کا رویہ ایسا تھا کہ وہ ہمیں سیٹ پر 7 گھنٹے انتظار کرواتے تھے، جب ہمیں اس کا اندازہ ہوگیا تو ہم نے سیٹ پر اپنا دوسرا کام ساتھ لے جانا شروع کر دیا کیونکہ معلوم تھا کہ سارا دن انتظار میں گزرے گا اور کسی کو نہیں پتا ہوتا تھا کہ وہ کب آئیں گے۔
انہوں نے مزید کہا کہ اسی دستاویزی فلم کے لیے شاہ رخ خان کے ساتھ کام کا تجربہ خوشگوار رہا، شاہ رخ خان ایک اچھے انسان ہیں اور ان کے ساتھ کام کرنا ایک مثبت تجربہ تھا۔
مشیل نے عالیہ بھٹ کے ساتھ کام کے بارے میں بھی بات کی اور بتایا کہ عالیہ بھٹ ایک انتہائی پروفیشنل اور خوش مزاج اداکارہ ہیں، جن کے ساتھ کام کرنا ایک خوشگوار تجربہ تھا۔
