87
نئی دہلی، بھارتی سپریم کورٹ نے مہاراشٹرا میں میونسپل کونسل کے سائن بورڈز پر اردو زبان کے استعمال کے خلاف دائر درخواست کو مسترد کرتے ہوئے ممبئی ہائیکورٹ کے فیصلے کو برقرار رکھا ہے۔
عدالت عظمیٰ کے دو رکنی بینچ نے ریمارکس دیے کہ اگر کسی علاقے میں اردو بولنے والے افراد موجود ہیں تو سرکاری زبان مراٹھی کے ساتھ اردو کا استعمال سائن بورڈز پر مناسب اور جائز ہے۔
سماعت کے دوران بینچ نے کہا کہ اردو ایک مؤثر رابطے کی زبان ہے، اور اس سے اجتناب کے بجائے دوستی کی جانی چاہیے، عدالت نے یہ بھی کہا کہ اردو بھارت کی اپنی زبان ہے، جو یہیں پیدا ہوئی، پروان چڑھی اور فروغ پائی۔
یہ درخواست ایک خاتون کی جانب سے دائر کی گئی تھی، جس میں موقف اختیار کیا گیا تھا کہ میونسپل کونسل کے بورڈز پر صرف مراٹھی زبان کا استعمال ہونا چاہیے، تاہم عدالت نے اس مؤقف کو مسترد کر دیا۔
