پاکستانی سکیورٹی فورسز نے بلوچستان میں پاک افغان سرحد کے قریب کامیاب آپریشن کے دوران 4 خطرناک افغان دہشت گردوں کو گرفتار کر کے بھاری مقدار میں اسلحہ برآمد کر لیا۔
سکیورٹی ذرائع کے مطابق 5 مارچ 2025 کو بلوچستان کے علاقے توبہ کاکڑی میں کارروائی کی گئی، جس میں چار دہشت گردوں کو گرفتار کیا گیا۔
ذرائع کا کہنا ہے کہ ملزمان کے قبضے سے کلاشنکوفیں، دستی بم، اور دیگر آتشیں اسلحہ برآمد کیا گیا۔
سکیورٹی حکام کے مطابق گرفتار دہشت گردوں نے پاکستان میں بڑے حملوں کی منصوبہ بندی کا اعتراف کیا ہے۔
گرفتار دہشت گرد اسام الدین نے اپنے اعترافی بیان میں بتایا کہ میرا نام اسام الدین اور والد کا نام گلشاد ہے۔ میں افغانستان سے آیا ہوں اور ہماری تربیت ہمارے نظریے کا حصہ ہے۔ میرے پاس 2 بندوقیں، 2 کلاشنکوف، ایک گرینیڈ اور دیگر اسلحہ تھا۔ ہم 3 روز قبل سرحدی باڑ عبور کرکے رات کے وقت چوری چھپے پاکستان میں داخل ہوئے اور ہمارا ہدف پشین پہنچنا تھا۔
سکیورٹی ذرائع کے مطابق گرفتار دہشت گردوں کو مزید تفتیش کے لیے نامعلوم مقام پر منتقل کر دیا گیا ہے۔ حکام کا کہنا ہے کہ اس سے قبل بھی کئی افغان دہشت گرد سکیورٹی فورسز کے ہاتھوں انجام کو پہنچ چکے ہیں۔
