لاہور، پنجاب پولیس کی بہادر خاتون افسر نے عالمی اعزاز کے لیے منتخب ہو کر پاکستان کا نام بین الاقوامی سطح پر روشن کر دیا۔
انٹرنیشنل ایسوسی ایشن آف ویمن پولیس نے ایس پی عائشہ بٹ کو ایکسی لینس پرفارمنس ایوارڈ 2025 کے لیے نامزد کر لیا ہے۔
پنجاب پولیس کے ترجمان کے مطابق، گلاسگو، اسکاٹ لینڈ میں اس سال ستمبر میں منعقد ہونے والی 62 ویں سالانہ کانفرنس میں ایس پی عائشہ بٹ کو عالمی ایوارڈ سے نوازا جائے گا، وہ اس وقت گوجرانوالہ میں سٹی ٹریفک آفیسر کے طور پر خدمات انجام دے رہی ہیں۔
ترجمان نے مزید بتایا کہ یہ ایوارڈ ہر سال دنیا بھر سے ایک نمایاں خاتون پولیس افسر کو دیا جاتا ہے، جو اپنے معاشرے میں نمایاں خدمات انجام دیتی ہے،عائشہ بٹ کو پولیسنگ میں شاندار کارکردگی اور غیر معمولی خدمات کے اعتراف میں اس اعزاز کے لیے چُنا گیا ہے۔
دریں اثنا، آئی جی پنجاب ڈاکٹر عثمان انور نے ایس پی عائشہ بٹ کو اس کامیابی پر مبارکباد دیتے ہوئے کہا کہ ان کی یہ کامیابی نہ صرف محکمہ پولیس بلکہ تمام خواتین افسران کے لیے فخر کا باعث ہے۔
