33
اسلام آباد، انسداد دہشت گردی عدالت نے 4 مقدمات میں پاکستان تحریک انصاف (پی ٹی آئی) کے سابق ترجمان رؤف حسن کی گرفتاری پر پابندی عائد کر دی۔
اے ٹی سی کے جج ابوالحسنات محمد ذوالقرنین نے 26 نومبر کے احتجاج سے متعلق درج مقدمات میں قبل از گرفتاری ضمانت کی درخواست پر سماعت کی، جس میں رؤف حسن اپنی وکیل عائشہ خالد کے ہمراہ عدالت میں پیش ہوئے۔
وکیل صفائی نے مؤقف اختیار کیا کہ ابھی تک کیس کا ریکارڈ فراہم نہیں کیا گیا، جس کے باعث دلائل دینا ممکن نہیں۔ اس پر عدالت نے ہدایت دی کہ آئندہ سماعت پر ریکارڈ مہیا کر کے دلائل دیے جائیں۔
عدالت نے تھانہ آبپارہ، کراچی کمپنی اور مارگلہ میں درج مقدمات کی سماعت 5 مئی تک ملتوی کر دی، جبکہ تھانہ رمنا کے مقدمے میں ضمانت کی درخواست پر سماعت 8 اپریل تک مؤخر کر دی گئی۔
یاد رہے کہ رؤف حسن کے خلاف 26 نومبر کے احتجاج پر مختلف مقدمات درج کیے گئے ہیں۔
