کینیڈا، چڑیا گھر میں انسانی غفلت کے باعث کم عمر گوریلا جان سے چلا گیا۔
غیر ملکی میڈیا کا کہنا ہے کہ کینیڈا کے صوبے البرٹا میں قائم کیلگری چڑیا گھر میں ایک ایسا افسوسناک واقعہ پیش آیا جو ایک بے زبان کی جان لے گیا۔ ویسٹرن لولینڈ گوریلا کی نسل سے تعلق رکھنے والی یہ 2 سالہ مادہ گوریلا تھی جس کا نام آئیرے رکھا گیا تھا۔
انتظامیہ کے مطابق آئیرے کو ٹریننگ کیلئے لے جایا جارہا تھا، جس کیلئے اسے گوریلا کے جھنڈ سے الگ کرنا تھا۔
انتظامیہ کا کہنا ہے کہ گوریلا کی دیکھ بھال کرنیوالے زو کیپر کی جانب سے غلط دروازہ کھولا گیا، جس میں پھنس کر آئیرے کا سر شدید زخمی ہوا اور وہ زخموں کی تاب نہ لاتے ہوئے چل بسی۔
اسی متعلق چڑیا گھر کے ڈائریکٹر کولین بیرڈ نے بتایا کہ آئیرے کی مختصر لیکن اثر انگیز زندگی نے ہماری کمیونٹی کو بہت خوشی دی، وہ سب کو بہت یاد آئے گی، ہم مستقبل میں ہونیوالے واقعات کو روکنے کے لیے ہر ممکن کوشش کریں گے۔
ڈائریکٹر نے بتایا کہ غفلت برتنے پر زو کیپر کو فوری نوکری سے ہٹا دیا گیا ہے تاہم اسے علاقے کے کسی دوسرے زو میں بھیجا جائے گا۔
