جہلم: موسم سرما کی تاخیر سے آمد کے باعث جہلم شہر میں مچھلی فروخت کرنے کی سرگرمیاں تاحال مندی کا شکار ہیں۔
نومبر کا مہینہ شروع ہونے کے باوجود سردی کی شدت میں کمی کے سبب مچھلی کے ڈھابوں اور ہوٹلوں پر وہ روایتی گہما گہمی دیکھنے میں نہیں آ رہی جو ہر سال سردیوں کے آغاز پر ہوا کرتی تھی۔
دکانداروں نے میڈیا سے گفتگو کرتے ہوئے بتایا کہ عام طور پر اکتوبر کے وسط میں سردی کا آغاز ہو جاتا ہے اور شہری اکتوبر کے آخری ہفتے سے فیملیز کے ہمراہ مچھلی کے ڈھابوں کا رخ کرتے ہیں۔ لوگ مچھلی وہیں بیٹھ کر کھانے کے ساتھ ساتھ گھروں کے لیے پارسل بھی کرواتے ہیں، مگر اس سال موسم کی غیر متوقع تبدیلی نے کاروباری سرگرمیوں کو بری طرح متاثر کیا ہے۔
ان کا کہنا تھا کہ جب تک موسم میں ٹھنڈک پیدا نہیں ہوتی، مچھلی کی طلب میں خاطر خواہ اضافہ ممکن نہیں۔ دکانداروں نے شکوہ کرتے ہوئے کہا کہ موسم کی تاخیر نے ان کے کاروبار کو نقصان پہنچایا ہے اور دعا کی کہ اللہ پاک موسم کو ٹھنڈا کرے تاکہ روزگار کے مواقع بحال ہوں اور ہمارے بچوں کو دو وقت کی روٹی میسر آ سکے۔
