تھانہ سوہاوہ پولیس نے امنِ عامہ میں خلل ڈالنے کے خلاف کارروائی کرتے ہوئے شادی کی تقریب کے دوران آتش بازی کرنے والے دو ملزمان کو گرفتار کر لیا ہے۔
تفصیلات کے مطابق ایس ایچ او تھانہ سوہاوہ اور ان کی ٹیم نے بروقت کارروائی کرتے ہوئے تھانہ سوہاوہ کے علاقہ میں منعقدہ شادی کی تقریب میں غیر قانونی آتش بازی کرنے پر دو ملزمان کے خلاف مقدمہ درج کر کے انہیں گرفتار کر لیا۔ پولیس نے ملزمان کے قبضے سے آتش بازی کا سامان بھی برآمد کر لیا ہے۔
پولیس کے مطابق ملزمان نے آتش بازی کے ذریعے امنِ عامہ میں خلل ڈالنے کا ارتکاب کیا، جس سے شہریوں کی جان و مال کو خطرات لاحق ہو سکتے تھے۔ واقعے کا نوٹس لیتے ہوئے فوری قانونی کارروائی عمل میں لائی گئی۔
اس موقع پر ڈسٹرکٹ پولیس آفیسر جہلم طارق عزیز سندھو کا کہنا تھا کہ شہریوں کی جان و مال کا تحفظ پولیس کی اولین ترجیح ہے اور امن و امان میں خلل ڈالنے والے عناصر کے خلاف سخت سے سخت قانونی کارروائی عمل میں لائی جائے گی۔
ترجمان جہلم پولیس کے مطابق ضلع بھر میں غیر قانونی آتش بازی اور دیگر ایسے اقدامات کے خلاف کریک ڈاؤن جاری رہے گا تاکہ شہریوں کو محفوظ ماحول فراہم کیا جا سکے۔
