خدمت مرکز جہلم پر میڈیکل کے لیے آنے والا اشتہاری گرفتار، ڈی پی او کی ٹیم کو شاباش، کریک ڈاؤن جاری
جہلم، ڈسٹرکٹ پولیس آفیسر جہلم طارق عزیز سندھو کی ہدایت پر پولیس خدمت مرکز ڈی ایچ کیو اسپتال جہلم پر ایک بڑی کامیابی حاصل کی گئی۔ میڈیکل رپورٹ بنوانے کے لیے آنے والا شخص سجاد علی، ریکارڈ چیک کرنے پر اشتہاری مجرم نکلا۔ پولیس اہلکاروں نے فوری کارروائی کرتے ہوئے اسے گرفتار کر کے تھانہ سٹی منتقل کر دیا۔ سجاد علی چوری اور موٹر سائیکل چوری جیسے سنگین جرائم میں سال 2023 سے تھانہ سٹی پولیس کو مطلوب تھا۔
ڈی پی او جہلم طارق عزیز سندھو نے خدمت مرکز پر تعینات عملے کی بروقت کارروائی کو سراہتے ہوئے شاباش دی اور کہا کہ پولیس کی تیز نظر اور مستعدی ہی مجرموں کی گرفتاری کو یقینی بنا رہی ہے۔ انہوں نے اس عزم کا اعادہ کیا کہ اشتہاری اور سنگین جرائم میں ملوث عناصر کے خلاف بھرپور کریک ڈاؤن جاری رکھا جائے گا اور انہیں قانون کے کٹہرے میں لایا جائے گا۔
پولیس ذرائع کے مطابق، سجاد علی پولیس ریکارڈ میں ایک خطرناک مجرم کے طور پر درج تھا، جس کی تلاش میں پولیس طویل عرصے سے مصروف تھی۔ اس کی گرفتاری پولیس کے مربوط ڈیٹا سسٹم اور پیشہ ورانہ مہارت کی مظہر ہے۔
جہلم: تھانہ سٹی پولیس کی کارروائی، مغوی بازیاب
شہری حلقوں نے بھی اس کارروائی کو سراہا اور امید ظاہر کی کہ پولیس اسی عزم و حوصلے سے جرائم کے خلاف کارروائیاں جاری رکھے گی تاکہ امن و امان کو برقرار رکھا جا سکے۔
یاد رہے کہ جہلم پولیس نے ماضی میں بھی کئی اشتہاریوں کو گرفتار کر کے قانون کے مطابق کارروائی کی ہے، اور خدمت مراکز کی نگرانی میں مزید سختی لائی جا رہی ہے تاکہ کوئی مجرم بچ نہ سکے۔
