جہلم، ڈسٹرکٹ پولیس آفیسر جہلم طارق عزیز سندھو کی زیرو ٹالرنس پالیسی پر عملدرآمد جاری ہے۔ ٹریفک قوانین کی خلاف ورزی پر تھانہ سول لائنز میں 2 پولیس اہلکاروں کے خلاف مقدمہ درج کر لیا گیا۔
وزیر اعلیٰ پنجاب مریم نواز شریف کے محفوظ پنجاب ویژن کے تحت ڈسٹرکٹ پولیس جہلم میں ٹریفک قوانین پر مکمل عملدرآمد یقینی بنانے کیلئے سخت اقدامات کیے جا رہے ہیں۔
ڈی پی او جہلم طارق عزیز سندھو نے کہا کہ پولیس فورس کا کوئی بھی فرد اگر قانون کی خلاف ورزی کرے گا تو اس کے خلاف بھی وہی کارروائی ہوگی جو کسی عام شہری کے خلاف کی جاتی ہے۔ انہوں نے واضح کیا کہ پولیس اہلکاروں کا خود قانون کے تابع رہنا ضروری ہے، تاکہ عوام میں قانون کی بالادستی اور پولیس کے مثبت امیج کو فروغ دیا جا سکے۔
ڈی پی او جہلم کے مطابق ٹریفک قوانین پر عملدرآمد سب کے لیے یکساں ہے اور اس سلسلے میں کسی کو بھی کوئی رعایت نہیں دی جائے گی۔
انہوں نے مزید کہا کہ محفوظ پنجاب ویژن کے تحت سڑکوں پر نظم و ضبط، شہریوں کی جان و مال کے تحفظ اور ٹریفک کے بہتر نظام کو یقینی بنانے کے لیے پولیس ہر سطح پر مؤثر اقدامات اٹھا رہی ہے۔
