جہلم: ڈسٹرکٹ پولیس آفیسر جہلم طارق عزیز سندھو کی ہدایات پر جہلم پولیس نے ضلع بھر میں جرائم پیشہ عناصر اور سماج دشمن افراد کے خلاف سپیشل سرچ آپریشنز اور ناکہ بندی کا سلسلہ جاری رکھا۔
پولیس کے مطابق ضلع بھر میں 13 مختلف مقامات پر سرچ آپریشنز کیے گئے، جن کے دوران 190 گھروں اور 380 افراد کی چیکنگ کی گئی۔ ان کارروائیوں کا مقصد دہشت گردی، جرائم پیشہ سرگرمیوں کی روک تھام اور اہم تنصیبات کی سیکیورٹی کو مزید مؤثر بنانا تھا۔
سرچ آپریشنز کے دوران شہریوں کی تصدیق پولیس ایپلیکیشن کے ذریعے کی گئی جبکہ شہر کے داخلی و خارجی راستوں پر خصوصی ناکہ بندی کے ساتھ سخت چیکنگ کی گئی۔ پولیس نے مجرمانِ اشتہاری، جرائم پیشہ افراد اور سماج دشمن عناصر کی گرفتاری کے لیے بھی مؤثر اقدامات کیے۔
ڈی پی او جہلم طارق عزیز سندھو نے کہا کہ سرچ آپریشنز کا مقصد ناجائز اسلحہ اور منشیات کی روک تھام، جرائم پیشہ عناصر کی سرکوبی اور شرپسندوں کو مذموم عزائم پر عمل سے باز رکھنا ہے۔ انہوں نے واضح کیا کہ شہریوں کے جان و مال کے تحفظ کے لیے یہ کارروائیاں آئندہ بھی بلاامتیاز جاری رہیں گی۔
