جہلم: پولیس نے 42 سالہ شخص کے اندھے قتل کا سراغ لگا لیا، پولیس نے شوٹرز سمیت 4 ملزمان کو سرگودھا سے گرفتار کر لیا۔ قتل کی واردات کا ماسٹر مائنڈ مقتول کا رشتہ دار نکلا۔
تفصیلات کے مطابق جہلم کے علاقے کریم پور روڈ پر قتل ہونے والے 42 سالہ سلیم کوثر کے اندھے قتل کا معمہ پولیس نے حل کر لیا۔ پولیس نے کارروائی کرتے ہوئے شوٹرز سمیت چار ملزمان کو سرگودھا سے گرفتار کر لیا جبکہ ابتدائی تحقیقات میں یہ بات سامنے آئی ہے کہ واردات کا ماسٹر مائنڈ مقتول کا رشتہ دار نکلا۔
پولیس کے مطابق واقعہ یکم نومبر کی صبح پیش آیا جب سلیم کوثر گھر سے کام پر جاتے ہوئے گولیوں کا نشانہ بنا تھا۔ واقعہ کے فوری بعد پولیس نے جائے وقوعہ کا معائنہ کیا اور شواہد اکٹھے کرنا شروع کیے۔
پولیس کے مطابق گرفتاریوں کے بعد معلوم ہوا کہ سمیع اللہ نامی ملزم نے رشتہ کے تنازعہ کو بنیاد بنا کر منصوبہ بندی کر کے واردات کروائی۔ مقتول کے لواحقین کا کہنا ہے کہ ملزمان سے پہلے بھی ہمارے گھر کے دروازے پر فائرنگ ہو چکی ہے، مگر کسی نے نوٹس نہیں لیا۔
پولیس کا کہنا ہے کہ گرفتار ملزمان سے اسلحہ برآمد کر لیا گیا ہے جبکہ مزید تفتیش جاری ہے۔
