جہلم شہر سمیت ضلع بھر کے گنجان آباد علاقوں میں غیر قانونی پٹرول ایجنسیاں اور گیس ریفلنگ کا دھندا تیزی سے پھیلنے لگا ہے، جس نے شہریوں کے لیے خطرناک صورتحال پیدا کر دی ہے۔
مختلف علاقوں میں بااثر افراد نے غیر قانونی طور پر پٹرول ایجنسیاں اور گیس ریفلنگ کے مراکز قائم کر رکھے ہیں، جہاں نہ صرف عوام سے من مانے نرخ وصول کیے جا رہے ہیں بلکہ حفاظتی اصولوں کی بھی کھلم کھلا خلاف ورزی کی جا رہی ہے۔
شہریوں کا کہنا ہے کہ اس غیر قانونی کاروبار کے باعث کسی بھی وقت کوئی بڑا حادثہ پیش آ سکتا ہے، کیونکہ گنجان آبادیوں میں بغیر کسی حفاظتی اقدامات کے پٹرول اور گیس کی فروخت جاری ہے۔
جہلم پولیس کا سپیشل سرچ آپریشن، 465 افراد کی چیکنگ، 10 افغان شہری گرفتار
اہلِ علاقہ کے مطابق سول ڈیفنس انتظامیہ نے اس سنگین مسئلے پر مکمل لاتعلقی اختیار کر رکھی ہے، جس کے باعث غیر قانونی کاروبار کرنے والوں کے حوصلے مزید بلند ہو رہے ہیں۔
شہریوں نے ڈپٹی کمشنر جہلم میر رضا اوزگن سے مطالبہ کیا ہے کہ فوری نوٹس لے کر غیر قانونی پٹرول ایجنسیوں اور گیس ریفلنگ کے خلاف کریک ڈاؤن کیا جائے اور ذمہ داران کے خلاف سخت قانونی کارروائی عمل میں لائی جائے تاکہ کسی بڑے حادثے سے پہلے اس خطرناک رجحان کا خاتمہ کیا جا سکے۔
