پنجاب فوڈ اتھارٹی کی جانب سے فوڈ سیفٹی قوانین پر عملدرآمد کو یقینی بنانے کے لیے ضلع جہلم میں بڑے پیمانے پر کارروائیاں کی گئیں۔ یہ کریک ڈاؤن ڈی جی پنجاب فوڈ اتھارٹی کی خصوصی ہدایات پر اور ڈپٹی کمشنر جہلم میر رضا اوزگن کی براہِ راست نگرانی میں کیا گیا، جس کا بنیادی مقصد شہریوں کو معیاری، محفوظ اور ملاوٹ سے پاک خوراک کی فراہمی کو یقینی بنانا ہے۔
کارروائیوں کے دوران فوڈ سیفٹی ٹیموں نے ضلع بھر میں مجموعی طور پر 71 فوڈ پوائنٹس کی جانچ پڑتال کی۔ معائنے کے دوران ایکسپائرڈ اشیائے خوردونوش کی موجودگی، ناقص صفائی، اور حفظانِ صحت کے اصولوں کی خلاف ورزیوں پر 12 فوڈ بزنسز پر مجموعی طور پر 1 لاکھ 39 ہزار روپے جرمانہ عائد کیا گیا۔
اس کے علاوہ، قواعد و ضوابط کی مکمل پابندی نہ کرنے پر 29 فوڈ بزنس آپریٹرز کو بہتری کے نوٹسز بھی جاری کیے گئے، جنہیں مقررہ مدت میں خامیاں دور کرنے کی ہدایت دی گئی ہے۔ فوڈ اتھارٹی حکام کا کہنا ہے کہ انسانی صحت سے کھیلنے والوں کے خلاف زیرو ٹالرنس پالیسی کے تحت کارروائیاں جاری رہیں گی۔
ڈپٹی کمشنر جہلم میر رضا اوزگن کا رورل ہیلتھ سینٹر للہ کا دورہ
ڈپٹی کمشنر جہلم میر رضا اوزگن نے پنجاب فوڈ اتھارٹی کی کارکردگی کو سراہتے ہوئے کہا کہ ہوٹلوں، بیکریوں، دودھ کی دکانوں اور دیگر فوڈ پوائنٹس کی باقاعدہ مانیٹرنگ انتہائی ضروری ہے۔ انہوں نے واضح کیا کہ پنجاب حکومت کے ویژن کے مطابق عوام کو صاف اور معیاری خوراک کی فراہمی ضلعی انتظامیہ کی اولین ترجیح ہے۔
ڈپٹی کمشنر نے مزید کہا کہ ملاوٹ مافیا کے خلاف گھیرا مزید تنگ کیا جائے گا اور کسی کو بھی قانون سے بالاتر نہیں سمجھا جائے گا۔ آخر میں شہریوں سے اپیل کی گئی کہ وہ غیر معیاری یا مضرِ صحت خوراک سے متعلق کسی بھی شکایت کی صورت میں فوری طور پر پنجاب فوڈ اتھارٹی یا ضلعی انتظامیہ کو آگاہ کریں تاکہ بروقت کارروائی ممکن بنائی جا سکے۔
