جہلم: ڈسٹرکٹ پولیس جہلم کی جانب سے ضلع بھر میں ٹریفک قوانین پر عملدرآمد کو یقینی بنانے کے لیے بھرپور اقدامات جاری ہیں۔ اس سلسلے میں مختلف اہم شاہراہوں، چوکوں اور داخلی و خارجی راستوں پر خصوصی ناکہ بندیاں قائم کی گئی ہیں، جہاں ٹریفک پولیس اور ضلع پولیس کی اضافی نفری تعینات کی گئی ہے۔
پولیس کے مطابق اس مہم کا مقصد شہریوں میں ٹریفک قوانین کی پاسداری کو فروغ دینا، ٹریفک حادثات کی روک تھام کرنا اور بغیر لائسنس ڈرائیونگ، کم عمر ڈرائیونگ، بغیر ہیلمٹ موٹر سائیکل چلانے، اوور اسپیڈنگ اور غلط پارکنگ جیسی خلاف ورزیوں کی حوصلہ شکنی کرنا ہے۔
ناکوں پر تعینات پولیس اہلکار شہریوں کو ٹریفک قوانین سے متعلق ضروری آگاہی فراہم کر رہے ہیں، جبکہ قوانین کی خلاف ورزی کی صورت میں بلا امتیاز کارروائیاں عمل میں لائی جا رہی ہیں۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ ٹریفک قوانین کی خلاف ورزی کسی صورت برداشت نہیں کی جائے گی اور شہریوں کی حفاظت ڈسٹرکٹ پولیس کی اولین ترجیح ہے۔ انہوں نے شہریوں سے اپیل کی کہ وہ ٹریفک قوانین پر سختی سے عمل کریں اور پولیس کے ساتھ تعاون کرتے ہوئے محفوظ سفر کو یقینی بنائیں۔
