جہلم: ڈپٹی کمشنر جہلم میر رضا اوزگن نے ڈسٹرکٹ ہیڈ کوارٹر ہسپتال جہلم کا تفصیلی دورہ کیا اور مختلف وارڈز میں مریضوں کو فراہم کی جانے والی طبی سہولیات کا معائنہ کیا۔ اس موقع پر انہوں نے ہسپتال انتظامیہ کو ہدایات جاری کرتے ہوئے کہا کہ حکومت پنجاب کے ویژن کے مطابق ہسپتال میں جدید طبی سہولیات کی فراہمی کو یقینی بنایا جا رہا ہے اور اس سلسلے میں کسی قسم کی کوتاہی ہرگز برداشت نہیں کی جائے گی۔
ڈپٹی کمشنر نے زور دیا کہ تمام مریضوں کو بروقت طبی امداد کی فراہمی اور شہریوں کی شکایات کا فوری ازالہ ضلعی انتظامیہ اور ہسپتال عملے کی مشترکہ ذمہ داری ہے، جس کے لیے ہمہ وقت متحرک رہنا ہوگا۔
دورے کے دوران ڈپٹی کمشنر نے ایمرجنسی، میڈیسن اسٹور اور دیگر شعبہ جات کا بھی معائنہ کیا اور ڈاکٹرز و پیرامیڈیکل اسٹاف کو ہدایت کی کہ ہسپتال آنے والے سائلین کے ساتھ حسنِ اخلاق سے پیش آئیں اور علاج معالجے میں ہر ممکن ریلیف فراہم کریں۔
میر رضا اوزگن نے مزید کہا کہ عوامی خدمت کے اس عمل میں وسائل کی کوئی کمی نہیں آنے دی جائے گی، تاہم فرائض میں غفلت یا لاپرواہی برتنے والے اہلکاروں کے خلاف سخت تادیبی کارروائی عمل میں لائی جائے گی۔
