جہلم: ڈپٹی کمشنر جہلم میر رضا اوزگن کی خصوصی ہدایت پر اسسٹنٹ کمشنر جہلم عبدالسمیع شیخ نے راولپنڈی ویسٹ مینجمنٹ کمپنی (RWMC) کے ضلعی اور تحصیل ہیڈکوارٹرز کا اہم دورہ کیا۔
دورے کا مقصد شہر میں صفائی ستھرائی کے انتظامات اور انتظامی ڈھانچے کی کارکردگی کا جامع جائزہ لینا تھا۔
دورے کے دوران اسسٹنٹ کمشنر نے صفائی آپریشنز، عملے کی حاضری اور انتظامی امور کا تفصیلی معائنہ کیا۔ فیلڈ میں موجود ٹیموں کی کارکردگی اور کوڑے کرکٹ کو ٹھکانے لگانے کے طریقہ کار کا جائزہ لیتے ہوئے انہوں نے صفائی کے نظام کو جدید خطوط پر استوار کرنے کی ضرورت پر زور دیا۔
اس موقع پر اسسٹنٹ کمشنر عبدالسمیع شیخ نے متعلقہ افسران کو ہدایات جاری کیں کہ صفائی کے نظام کو مزید مؤثر بنایا جائے اور شہریوں کی شکایات کا فوری ازالہ یقینی بنایا جائے۔ انہوں نے واضح کیا کہ صفائی کے معیار پر کسی بھی قسم کا سمجھوتہ برداشت نہیں کیا جائے گا تاکہ ضلع جہلم کو ایک صاف ستھرا، منظم اور مثالی ضلع بنایا جا سکے۔
