جہلم میں ڈھوک منور روڈ پر سی سی ڈی اور مسلح ملزمان کے درمیان مقابلے میں ایک ملزم زخمی حالت میں گرفتار، دو ساتھی فرار ہوگئے۔
جہلم کے علاقے ڈھوک منور روڈ پر سی سی ڈی اور مسلح ملزمان کے درمیان مبینہ مقابلہ ہوا جس میں ایک ملزم زخمی حالت میں گرفتار کر لیا گیا جبکہ اس کے دو ساتھی موقع سے فرار ہو گئے۔
ترجمان سی سی ڈی کے مطابق ناکہ بندی کے دوران ایک مشکوک موٹر سائیکل کو رکنے کا اشارہ کیا گیا جس پر سوار افراد نے پولیس پر اندھا دھند فائرنگ کر دی، فائرنگ کے نتیجے میں ایک گولی کانسٹیبل کے سینے پر لگی تاہم خوش قسمتی سے بلٹ پروف جیکٹ کی وجہ سے وہ محفوظ رہے۔
جوابی کارروائی میں ایک ملزم کو زخمی حالت میں گرفتار کیا گیا جس کی شناخت علی رضا ولد کرم بخش سکنہ منڈی بہاؤالدین کے نام سے ہوئی، گرفتار ملزم کو طبی امداد کے لیے ہسپتال منتقل کر دیا گیا جبکہ اس کے دو نامعلوم ساتھی فرار ہونے میں کامیاب ہو گئے۔
پولیس ذرائع کے مطابق گرفتار ملزم علی رضا کے خلاف تھانہ سول لائنز منڈی بہاؤالدین میں موٹرسائیکل چوری، منشیات فروشی اور ڈکیتی کے متعدد مقدمات درج ہیں۔ پولیس نے ملزم سے 8 ایم ایم رائفل بھی برآمد کر لی ہے۔
واقعہ کے بعد علاقے میں سرچ آپریشن شروع کر دیا گیا ہے تاکہ مفرور ملزمان کو بھی گرفتار کیا جا سکے۔ سی سی ڈی حکام کا کہنا ہے کہ گرفتار ملزم سے مزید اہم انکشافات متوقع ہیں۔
