جہلم کے علاقے قیصرآباد میں پرانی رنجش پر 28 سالہ بلال قریشی کو فائرنگ کرکے قتل کر دیا گیا، ملزمان موقع سے فرار، پولیس نے تفتیش شروع کر دی۔
جہلم کے تھانہ صدر کی حدود میں افسوسناک واقعہ پیش آیا، جہاں معمولی رنجش پر 28 سالہ نوجوان بلال قریشی کو بے دردی سے قتل کر دیا گیا۔
واقعہ قیصرآباد کے علاقے میں پیش آیا جہاں مبینہ طور پر عبدالمجید نامی شخص نے اپنے ساتھیوں کے ہمراہ بلال قریشی پر فائرنگ کی، جس سے وہ موقع پر ہی جاں بحق ہو گیا۔ ملزمان واردات کے بعد فرار ہو گئے۔
پولیس کے مطابق بلال قریشی اور عبدالمجید کے درمیان پرانی رنجش چل رہی تھی، جس کی بنیاد پر مقتول کو قتل کی دھمکیاں بھی ملتی رہی تھیں۔ بلال کے لواحقین کا کہنا ہے کہ عبدالمجید کو اس بات پر رنج تھا کہ مقتول نے اس کے مخالفین کا ساتھ دیا تھا، یہی تنازعہ بالآخر جان لیوا ثابت ہوا۔
واقعہ کی اطلاع ملتے ہی تھانہ صدر پولیس جائے وقوعہ پر پہنچی، شواہد اکٹھے کیے گئے اور بلال قریشی کی لاش کو پوسٹ مارٹم کے لیے ڈسٹرکٹ ہیڈ کوارٹر ہسپتال منتقل کر دیا گیا ہے۔ عبدالمجید اور اس کے ساتھیوں کی گرفتاری کے لیے چھاپے مارے جا رہے ہیں اور انہیں جلد انصاف کے کٹہرے میں لایا جائے گا۔
