جہلم میں پولیس نے غیر قانونی مقیم افغان باشندوں کے خلاف کریک ڈاؤن کرتے ہوئے 3 افغان شہریوں کو گرفتار کر کے ہولڈنگ کیمپ منتقل کر دیا۔
تفصیلات کے مطابق حکومت پنجاب کے احکامات کی روشنی میں ضلع جہلم میں غیر قانونی مقیم افغان باشندوں کے خلاف کریک ڈاؤن جاری ہے۔ اس سلسلے میں تھانہ کالا گجراں پولیس نے سرچ آپریشن کے دوران غیر قانونی طور پر مقیم افغان شہریوں کو پناہ دینے والے ایک مقامی ملزم سمیت 3 غیر قانونی افغان باشندوں کو گرفتار کر لیا۔
پولیس کے مطابق گرفتار افغان باشندوں کو ضروری قانونی کارروائی کے بعد ہولڈنگ کیمپ منتقل کر دیا گیا ہے، جبکہ پناہ دینے والے ملزم کے خلاف بھی قانون کے مطابق کارروائی عمل میں لائی جا رہی ہے۔
ڈی پی او جہلم طارق عزیز سندھو کا کہنا ہے کہ شہری کسی بھی غیر قانونی مقیم غیر ملکی کو مکان، دکان یا گاڑی کرایہ پر نہ دیں۔ غیر قانونی مقیم غیر ملکی کسی قسم کا کاروبار، خرید و فروخت یا ملازمت نہیں کر سکتے۔ قانونی طور پر مقیم غیر ملکیوں کے لیے لازم ہے کہ وہ اپنی رجسٹریشن متعلقہ تھانے میں کروائیں۔
جہلم پولیس کی بڑی کارروائی، غیر قانونی پتنگیں اور خونی ڈور برآمد، ملزم گرفتار
انہوں نے مزید کہا کہ شہری کسی بھی غیر قانونی مقیم غیر ملکی کی موجودگی کی فوری اطلاع پولیس کو دیں۔ حکومتِ پنجاب کی ہدایات پر سختی سے عملدرآمد جاری ہے اور خلاف ورزی کی صورت میں بلا امتیاز قانونی کارروائی عمل میں لائی جائے گی۔
ڈی پی او جہلم کے مطابق عوامی آگاہی کے لیے سوشل میڈیا، مساجد اور مقامی سطح پر اعلانات کا سلسلہ بھی جاری ہے۔ انہوں نے واضح کیا کہ کسی کے ساتھ ظلم یا ناانصافی برداشت نہیں کی جائے گی، تاہم غیر قانونی رہائش رکھنے والوں کو یہاں قیام کی اجازت نہیں دی جائے گی۔
