ڈپٹی کمشنر جہلم نے نئی تعمیر شدہ سڑکوں پر جاری تزئین و آرائش کے کام کا معائنہ کیا اور اطراف کی خوبصورتی کے لیے اضافی اقدامات کی ہدایت دی
جہلم، ڈپٹی کمشنر میثم عباس نے ضلع میں نئی تعمیر ہونے والی سڑکوں پر جاری تزئین و آرائش کے کاموں کا تفصیلی جائزہ لیا اور متعلقہ محکموں کو سڑکوں کی خوبصورتی اور اطراف کے ماحول کو مزید بہتر بنانے کی ہدایات جاری کیں۔ سڑکوں کی پائیداری کے ساتھ ساتھ ان کی ظاہری خوبصورتی بھی عوامی سہولت اور شہر کی شناخت کے لیے نہایت اہم ہے۔
معائنے کے دوران انہوں نے سڑکوں کے کناروں پر شجر کاری، نکاسیٔ آب کے نظام، فٹ پاتھ کی بہتری اور ڈرینج کی صفائی کے حوالے سے متعلقہ اداروں کو فوری اقدامات کی ہدایت دی۔ انہوں نے تاکید کی کہ سڑکوں کے اطراف موجود سرکاری و نجی عمارات کی صفائی اور ترتیب کو بھی بہتر بنایا جائے تاکہ مجموعی طور پر شہر کا حسن نکھر کر سامنے آئے۔
جہلم کی ضلعی انتظامیہ کی شاندار کارکردگی، ایک بار پھر چوتھی پوزیشن
ڈپٹی کمشنر نے کہا کہ وزیراعلیٰ پنجاب مریم نواز شریف کے وژن کے مطابق ضلع جہلم کو ترقی یافتہ، صاف ستھرا اور ماڈل شہر بنانے کے لیے ہر ممکن اقدامات کیے جا رہے ہیں۔ اس موقع پر انہوں نے تمام افسران پر زور دیا کہ عوامی فلاح کے منصوبوں میں کسی قسم کی کوتاہی یا سستی برداشت نہیں کی جائے گی۔
یاد رہے کہ** حکومتِ پنجاب کی ہدایات پر کمشنر راولپنڈی اور چیف سیکریٹری پنجاب کی زیر نگرانی صوبے بھر میں سڑکوں کی تعمیر و تزئین کے منصوبوں کو ترجیحی بنیادوں پر مکمل کیا جا رہا ہے، تاکہ عوام کو بہتر سفری سہولیات اور صاف ستھرا ماحول میسر آ سکے۔
