جہلم: اسسٹنٹ کمشنر جہلم عبدالسمیع شیخ نے جی ٹی روڈ پر صفائی کے انتظامات کا تفصیلی دورہ کیا اور راولپنڈی ویسٹ مینجمنٹ کمپنی (آر ڈبلیو ایم سی) کے فیلڈ عملے کی حاضری اور کوڑا کرکٹ ٹھکانے لگانے کے عمل کا جائزہ لیا۔
دورے کے دوران فوجی مل گراؤنڈ اور آشیانہ کے قریب صفائی کی ناقص صورتحال پر اسسٹنٹ کمشنر نے سخت برہمی کا اظہار کیا۔ انہوں نے آر ڈبلیو ایم سی حکام کو فوری طور پر ان مقامات سے کوڑا کرکٹ ہٹانے کے احکامات جاری کیے، جس پر موقع پر خصوصی ٹیمیں تعینات کر دی گئیں تاکہ دوبارہ گندگی جمع نہ ہو اور جی ٹی روڈ کے اطراف صفائی کا معیار برقرار رکھا جا سکے۔
ڈپٹی کمشنر جہلم میر رضا اوزگن کی ہدایت پر عبدالسمیع شیخ نے واضح کیا کہ شہر کی صفائی اور خوبصورتی پر کوئی سمجھوتہ نہیں کیا جائے گا۔ انہوں نے ویسٹ مینجمنٹ کمپنی کو ہدایت کی کہ مانیٹرنگ نظام کو مزید مؤثر بنایا جائے اور روزانہ کی بنیاد پر زیرو ویسٹ آپریشن یقینی بنایا جائے۔
ضلعی انتظامیہ نے ’صاف ستھرا جہلم‘ مہم کے تحت آر ڈبلیو ایم سی کے تعاون سے ضلع بھر میں مثالی صفائی کے عزم کا اعادہ کیا ہے۔
