اسلام آباد پولیس نے ٹک ٹاکر سامعہ حجاب کو ہراساں کرنے، قتل اور اغوا کی دھمکیاں دینے کے الزام میں حسن زاہد نامی شخص کو گرفتار کر لیا ہے۔
پولیس کا کہنا ہے کہ یہ کارروائی سامعہ کی شکایت اور ویڈیو بیان موصول ہونے کے بعد کی گئی۔
تھانہ شالیمار میں اس کیس کا مقدمہ درج کیا گیا ہے جس میں خواتین کی عزت کو مجروح کرنے، زبردستی اغوا اور ہراسانی سمیت دیگر دفعات شامل کی گئی ہیں۔
سامعہ حجاب نے سوشل میڈیا پر بتایا کہ ملزم کئی دنوں سے ان کا پیچھا کر رہا تھا اور تحائف دے کر شادی کی پیشکش کی، جسے انکار پر وہ مسلسل ہراساں کرتا رہا اور ان کے گھر تک پہنچ گیا۔
سامعہ نے بتایا کہ ملزم نے واضح دھمکی دی کہ اگر شادی سے انکار کیا تو اسے قتل کر دیا جائے گا۔ گرفتاری سے قبل ملزم نے ایف آئی آر واپس لینے کا بھی مطالبہ کیا تھا۔
اسلام آباد میں ٹک ٹاکر سامعہ حجاب کو ہراساں کرنے والا شخص گرفتار
اس سے قبل ایک ویڈیو میں سامعہ نے کہا تھا کہ ملزم نے ان کے گھر کی گھنٹی بجائی، دروازہ کھلنے پر زبردستی انہیں ساتھ لے جانے کی کوشش کی اور فون چھین کر گاڑی میں بیٹھ گیا۔ جب وہ فون واپس لینے بھاگی تو ملزم نے انہیں ہراساں کیا اور اغوا کی کوشش کی۔
پولیس کے مطابق مقدمے کی مزید تفتیش جاری ہے اور ملزم کے خلاف ٹھوس شواہد جمع کیے جا رہے ہیں۔
