فیصل آباد: پاکستانی فیشن انڈسٹری کی ابھرتی ہوئی ماڈل اور معروف ٹک ٹاکر رومیسا سعید ٹریفک حادثے میں زخمی ہونے کے بعد دورانِ علاج انتقال کرگئیں۔
تفصیلات کے مطابق رومیسا سعید چند روز قبل فیصل آباد کے قریب ایک ٹریفک حادثے کا شکار ہوئیں، حادثے میں انہیں شدید چوٹیں آئیں۔ انہیں فوری طور پر اسپتال منتقل کیا گیا جہاں وہ کئی روز تک زیرِ علاج رہیں، تاہم 17 اکتوبر کو زخموں کی تاب نہ لاتے ہوئے انتقال کر گئیں۔
رومیسا سعید کا شمار اُن نوجوان ماڈلز میں ہوتا تھا جو فیشن انڈسٹری اور سوشل میڈیا پلیٹ فارمز، خصوصاً ٹک ٹاک اور انسٹاگرام پر تیزی سے مقبول ہو رہی تھیں۔ وہ اپنی دلکش شخصیت، اعتماد اور منفرد اندازِ پیشکش کے باعث فیشن شوز میں نمایاں رہتی تھیں۔
شوبز اور فیشن انڈسٹری سے وابستہ شخصیات نے ان کے انتقال پر گہرے دکھ اور افسوس کا اظہار کیا۔ متعدد ساتھی فنکاروں اور مداحوں نے سوشل میڈیا پر انہیں خراجِ عقیدت پیش کرتے ہوئے کہا کہ ’’رومیسا نہایت باصلاحیت، خوش اخلاق اور پروفیشنل ماڈل تھیں، ان کی کمی ہمیشہ محسوس کی جائے گی۔‘‘
مرحومہ کی نمازِ جنازہ فیصل آباد میں ادا کی گئی، جس کے بعد ننکانہ صاحب کے مقامی قبرستان میں تدفین عمل میں آئی۔
رومیسا سعید کی اچانک وفات نے فیشن اور سوشل میڈیا برادری کو گہرے صدمے میں مبتلا کر دیا ہے۔
