لاہور: پاکستانی ڈرامہ انڈسٹری کی معروف اداکارہ سارہ عمیر نے حالیہ انٹرویو میں اپنے سابقہ بیان سے رجوع کرتے ہوئے کہا ہے کہ مرد خواتین کی زندگی میں نہایت اہم مقام رکھتے ہیں اور وہ ان کے نگہبان اور کفیل ہوتے ہیں۔ ان کا کہنا تھا کہ مرد عورت کی زندگی کا سب سے بڑا سہارا اور اثاثہ ہو سکتے ہیں۔
اداکارہ نے یہ گفتگو میزبان و اداکار احمد علی بٹ کے پوڈکاسٹ میں بطور مہمان شرکت کے دوران کی۔ پروگرام میں انہوں نے اپنے فنی سفر، نجی زندگی اور ازدواجی معاملات پر کھل کر اظہارِ خیال کیا۔ گفتگو کے دوران انہوں نے متعدد مواقع پر اپنے شوہر اور ہدایتکار محسن طلعت کا ذکر کیا، تاہم انہیں سابق شوہر کہنے سے گریز کیا۔
سارہ عمیر نے کہا کہ زندگی میں بعض اوقات بیانات کو سیاق و سباق سے ہٹ کر پیش کیا جاتا ہے جس سے غلط فہمیاں جنم لیتی ہیں۔ ان کے مطابق مرد اور عورت ایک دوسرے کے لیے لازم و ملزوم ہیں اور معاشرتی نظام میں دونوں کا کردار اپنی جگہ اہم ہے۔ انہوں نے کہا کہ ایک مضبوط مرد عورت کے لیے تحفظ اور استحکام کا ذریعہ بن سکتا ہے۔
شریف مرد نایاب ہو گئے، اچھا جیون ساتھی ملے تو دیر نہیں کرنی چاہیے: غنا علی
یاد رہے کہ سارہ عمیر 2014 تک شوبز انڈسٹری میں متحرک رہیں، تاہم محسن طلعت سے شادی کے بعد انہوں نے میڈیا سے کنارہ کشی اختیار کر لی تھی۔ اس جوڑے کے دو بیٹے ہیں اور اداکارہ اب خاندانی زندگی پر زیادہ توجہ دے رہی ہیں۔
ان کے حالیہ بیان کے بعد سوشل میڈیا پر مختلف آرا سامنے آ رہی ہیں، جہاں کچھ صارفین ان کے مؤقف کی تائید کر رہے ہیں جبکہ بعض اسے متنازع قرار دے رہے ہیں۔
