پاکستان شوبز انڈسٹری کی سینئر اداکارہ ثمینہ پیرزادہ نے معاشرتی رویوں پر کڑی تنقید کرتے ہوئے کہا ہے کہ کسی بھی شخص کی ظاہری شکل، جسامت یا عمر پر تبصرہ کرنا نہ صرف غیر اخلاقی ہے بلکہ یہ ایک خطرناک رویہ بنتا جا رہا ہے جو لوگوں کی ذہنی صحت کو متاثر کرتا ہے۔
ایک حالیہ انٹرویو میں ثمینہ پیرزادہ نے باڈی شیمنگ جیسے منفی رجحان پر کھل کر بات کی۔ انہوں نے کہا کہ معاشرے میں یہ عام ہو چکا ہے کہ لوگوں کو ان کی جسمانی ساخت، موٹاپے یا عمر کے بڑھنے پر مذاق کا نشانہ بنایا جاتا ہے۔ انہوں نے کہا کہ یہ نہ صرف توہین آمیز ہے بلکہ ان افراد کی حوصلہ شکنی کا باعث بھی بنتا ہے جو محنت سے آگے بڑھنے کی کوشش کر رہے ہوتے ہیں۔
ثمینہ پیرزادہ نے کہا کہ کسی کی بڑھتی عمر کو بنیاد بنا کر یہ کہنا کہ "اب آپ کو ریٹائر ہو جانا چاہیے یا گھر بیٹھ جانا چاہیے” ایک بے حس رویہ ہے۔ انہوں نے واضح کیا کہ انہوں نے اپنی فنی زندگی میں جو مقام حاصل کیا ہے، وہ سالوں کی محنت، لگن اور مسلسل جدوجہد کا نتیجہ ہے، اور عمر کسی بھی شخص کے خوابوں یا صلاحیتوں پر حد نہیں لگا سکتی۔
ان کی بات سے اتفاق کرتے ہوئے اداکارہ سونیا حسین نے بھی کہا کہ آج کے ڈیجیٹل دور میں آن لائن ٹرولنگ ایک سنگین مسئلہ بن چکی ہے، جو براہ راست افراد کی خوداعتمادی اور ذہنی سکون کو متاثر کرتی ہے۔ انہوں نے کہا کہ سوشل میڈیا پر دوسروں کی تضحیک کرنے والوں کو سوچنا چاہیے کہ ان کے الفاظ کس حد تک نقصان دہ ہو سکتے ہیں۔
دونوں اداکاراؤں کا کہنا تھا کہ معاشرے کو ایسے رویوں کے خلاف کھڑا ہونا ہوگا تاکہ ہر شخص کو عزت اور خود اعتمادی کے ساتھ جینے کا حق مل سکے۔
