معروف پرفارمر اور ٹک ٹاک اسٹار مہک ملک کے حوالے سے خبریں گردش کر رہی ہیں کہ انہوں نے پی ایس ایل کی نئی فیصل آباد ٹیم خرید لی ہے اور وہ اس نئی فرنچائز کی مالک بن گئی ہیں۔
اگرچہ اس خبر کی ابھی تک باضابطہ طور پر تصدیق نہیں ہوئی، لیکن سوشل میڈیا پر اس حوالے سے بحث جاری ہے۔
سوشل میڈیا صارفین کا کہنا ہے کہ اگر یہ دعویٰ درست ہے تو یہ پاکستان کی کھیلوں میں صنفی شمولیت کی طرف ایک بہت بڑا قدم ہوگا۔ کئی صارفین اور تجزیہ کاروں نے اسے قابلِ تعریف پیش رفت قرار دیتے ہوئے کہا ہے کہ یہ قدم پیشہ ورانہ کھیلوں میں ٹرانس جینڈر کمیونٹی کے لیے نئی راہیں کھول سکتا ہے اور کم نمائندگی والی کمیونٹیز کو بڑی سطح پر کھیلوں میں شامل ہونے کی ترغیب دے گا۔
کئی سوشل میڈیا پوسٹوں میں یہ بھی دعویٰ کیا جا رہا ہے کہ پی ایس ایل کے عہدیداروں نے مہک ملک کے ممکنہ داخلے کا خیرمقدم کیا ہے اور اسے لیگ کے لیے مثبت تبدیلی قرار دیا ہے۔ تاہم، ابھی تک نہ پاکستان کرکٹ بورڈ اور نہ ہی پی ایس ایل انتظامیہ نے مہک ملک کی جانب سے ٹیم خریدنے کی باضابطہ تصدیق کی ہے، اس لیے یہ خبر اس وقت صرف سوشل میڈیا کی سطح پر موجود دعویٰ یا افواہ سمجھی جا رہی ہے۔
واضح رہے کہ پی سی بی نے حال ہی میں پی ایس ایل کی توسیع کے لیے 6 شہروں کو شارٹ لسٹ کیا تھا، جن میں حیدرآباد، سیالکوٹ، مظفرآباد، فیصل آباد، گلگت اور راولپنڈی کی ٹیمیں شامل تھیں۔ بعد ازاں گلگت اور فیصل آباد کو فائنل کیا گیا۔
