پاکستانی اداکارہ نتاشا علی نے ہمارے معاشرے کے اہم اور حساس مسئلے پر اپنی رائے کا اظہار کیا ہے۔
حال ہی میں ایک مارننگ شو میں شرکت کے دوران انہوں نے بھائی کی بیویوں کے رویے پر روشنی ڈالی جو اکثر بیوہ، غیر شادی شدہ اور طلاق یافتہ نندوں کے ساتھ برتا جاتا ہے۔
نتاشا علی کا کہنا تھا کہ اگر کوئی لڑکی غیر شادی شدہ ہے تو اس کا پورا حق ہے کہ وہ اپنے ماں باپ کے گھر رہے اور اس پر کسی بھابھی کو حق نہیں بنتا کہ وہ اسے بوجھ سمجھے، اختلافات کرے یا نفرت کرے۔ انہوں نے مزید کہا کہ اکثر بھابھیاں غیر ضروری مسائل پیدا کرنے کی کوشش کرتی ہیں جو بالکل درست نہیں۔
اداکارہ نے طلاق یافتہ اور بیوہ خواتین کے حوالے سے بھی کہا کہ وہ بھی اپنے والدین کے گھر آتی ہیں، اور اگر وہ کہیں اور جائیں تو خود کو نقصان پہنچا سکتی ہیں، خاص طور پر اگر وہ خود نوکری نہیں کر سکتیں تو ان کا اور کہاں جانا ہے؟ اس لیے بھابھیوں کو چاہیے کہ وہ ان نندوں کی عزت کریں اور ان کا ساتھ دیں۔
نتاشا علی کا یہ کلپ سوشل میڈیا پر وائرل ہو گیا ہے جس پر صارفین کے ملے جلے ردعمل سامنے آئے ہیں۔ کچھ صارفین کا کہنا تھا کہ احترام باہمی ہونا چاہیے، نندوں کو بھی بھابھیوں کی عزت کرنی چاہیے اور تعلقات میں نرمی برتنا ضروری ہے۔
