انٹرنیٹ کی دنیا میں مقبول ترین یوٹیوبر "مسٹر بیسٹ” کی ماہانہ آمدنی کے حیران کن حقائق سامنے آ گئے، جس نے انٹرنیٹ صارفین کو دنگ کر دیا۔
دنیا کے نمبر ون یوٹیوبر جمی ڈونلڈسن، جو "MrBeast” کے نام سے مشہور ہیں، کی یوٹیوب سے ہونے والی ماہانہ کمائی کے اعداد و شمار لیک ہو گئے ہیں، جو کسی کو بھی حیران کر سکتے ہیں۔
مسٹر بیسٹ کی ماہانہ آمدنی کتنی ہے؟
مسٹر بیسٹ کے یوٹیوب چینل پر 36 کروڑ سے زائد سبسکرائبرز ہیں اور ان کی ویڈیوز پر اربوں کی تعداد میں ویوز آتے ہیں۔ حال ہی میں، ایکس (سابقہ ٹوئٹر) پر "ڈرامہ الرٹ” نامی اکاؤنٹ نے مسٹر بیسٹ کی مبینہ آمدنی کا اسکرین شاٹ شیئر کیا، جس کے مطابق ان کی گزشتہ 28 دنوں کی کمائی 40 لاکھ ڈالر (تقریباً 1 ارب 11 کروڑ پاکستانی روپے) سے زائد رہی۔
اس خبر کے بعد سوشل میڈیا پر صارفین کی جانب سے تبصروں کا طوفان آ گیا۔ کچھ لوگوں کا کہنا تھا کہ مسٹر بیسٹ کی اصل کمائی اس سے کہیں زیادہ ہے، کیونکہ وہ بڑی اسپانسرشپ ڈیلز بھی حاصل کرتے ہیں، جو لاکھوں ڈالرز میں ہوتی ہیں۔ ایک صارف نے کہا کہ مسٹر بیسٹ اس کمائی کے مستحق ہیں کیونکہ وہ اپنی ویڈیوز پر بہت زیادہ محنت کرتے ہیں۔
مسٹر بیسٹ کی آمدنی کے دیگر ذرائع
مسٹر بیسٹ کی کمائی صرف یوٹیوب تک محدود نہیں، بلکہ ان کی ایک وسیع کاروباری سلطنت بھی ہے۔ ان کے کئی یوٹیوب چینلز ہیں اور وہ مختلف عالمی برانڈز کے ساتھ کام کرتے ہیں۔ اندازے کے مطابق، ان کی سالانہ آمدنی 10 کروڑ ڈالر سے بھی زیادہ ہے۔
اگرچہ مسٹر بیسٹ یا ان کی ٹیم نے ان اعداد و شمار کی باضابطہ تصدیق نہیں کی، لیکن اس میں کوئی شک نہیں کہ وہ یوٹیوب کے سب سے زیادہ کمائی کرنے والے یوٹیوبرز میں شامل ہیں۔ ان کی ویڈیوز نہ صرف مقبول ہیں بلکہ ان سے زبردست مالی فائدہ بھی حاصل ہوتا ہے۔
مسٹر بیسٹ کی اصل کمائی کتنی ہے؟
مسٹر بیسٹ کی حقیقی آمدنی کے حوالے سے مختلف تخمینے لگائے جا رہے ہیں۔ 2024 میں فوربس نے ان کی سالانہ آمدنی تقریباً 85 ملین ڈالر بتائی تھی، جبکہ "سیلیبریٹی نیٹ ورتھ” کے مطابق، وہ ممکنہ طور پر ماہانہ 50 ملین ڈالر تک کماتے ہیں۔ یہ فرق ظاہر کرتا ہے کہ ان کی اصل کمائی کا اندازہ لگانا کتنا مشکل ہے۔
دلچسپ بات یہ ہے کہ فوربس نے 2022 میں ان کی مجموعی دولت تقریباً 500 ملین ڈالر بتائی تھی، جو صرف دو سال میں ان کی غیرمعمولی مالی ترقی کو ظاہر کرتی ہے۔
