کراچی: معروف پاکستانی اداکارہ مدیحہ امام نے انکشاف کیا ہے کہ اگر انہیں زندگی بھر کسی ایک اداکار کے ساتھ کام کرنے کا موقع ملے تو وہ فیصل قریشی کے ساتھ کام کرنا پسند کریں گی۔
نجی ٹی وی کے کامیڈی شو "ہنسنا منع ہے” میں میزبان تابش ہاشمی سے گفتگو کرتے ہوئے مدیحہ امام نے اپنے کیریئر اور ذاتی تجربات پر روشنی ڈالی اور کئی دلچسپ واقعات سنائے۔
ترکیہ میں جعلی کرنسی کا واقعہ
اداکارہ نے بتایا کہ وہ پہلی بار کام کے سلسلے میں ترکیہ گئیں۔ وہاں حلال کھانوں کے حوالے سے خدشات کی وجہ سے زیادہ تر وقت ہوٹل میں گزارا۔ لیکن والدہ کے اصرار پر واپسی سے ایک دن قبل گھومنے نکلیں۔
اپنی بیوی کے ساتھ تصویر نہیں لگاؤں گا کیونکہ میرا مذہب اجازت نہیں دیتا، اذان سمیع
مدیحہ کے مطابق انہوں نے ایک ٹھیلے سے فروٹ چاٹ خریدی اور جب ترکش کرنسی میں ادائیگی کی تو فروٹ فروش نے غصے میں آ کر سیکیورٹی گارڈ کو بلالیا۔ چونکہ مدیحہ کو ترکی زبان نہیں آتی تھی، وہ معاملہ سمجھ نہیں سکیں۔ بعدازاں معلوم ہوا کہ ان کے پاس موجود کرنسی جعلی تھی، جو انہوں نے پاکستان سے تبدیل کروائی تھی۔ اس موقع پر ان کے ویگن ڈرائیور نے صورتِ حال کو سنبھالا اور بل ادا کیا۔
یمنیٰ زیدی سے کنفیوژن
مدیحہ امام نے ایک اور دلچسپ واقعہ بیان کرتے ہوئے بتایا کہ بیرونِ ملک ایک شاپنگ مال میں ایک خاتون ان کے پاس آئیں اور ان کے ڈراموں کی تعریف کرنے لگیں۔ لیکن وہ ڈرامے دراصل یمنیٰ زیدی کے تھے۔
مدیحہ کے مطابق: "مجھے لگا شاید میری یادداشت چلی گئی ہے کیونکہ وہ تمام ڈرامے میرے نہیں تھے۔”
اداکارہ نے مزید کہا کہ جب خاتون نے ان سے آٹوگراف مانگا تو وہ شرمندہ اور افسردہ ہوئیں۔ تاہم خاتون کے شوہر نے آ کر بتایا کہ یہ مدیحہ امام ہیں، جس پر وہ خاتون اپنے شوہر سے بحث کرنے لگیں۔ مدیحہ نے مسکراتے ہوئے بتایا کہ "آخرکار میں نے انہیں آٹوگراف دیا جس پر صرف ‘Love’ لکھا، لیکن اپنا نام نہیں لکھا۔”
