اسلام آباد،پاکستانی ڈرامہ انڈسٹری کے معروف اداکار عمران عباس نے حال ہی میں اداکار ببرک شاہ کی جانب سے دی گئی تنقید کا مؤدبانہ جواب دے دیا۔
ببرک شاہ نے ایک انٹرویو میں عمران عباس کو ہدفِ تنقید بناتے ہوئے کہا تھا کہ وہ فلمی ہیرو کے قابل نہیں اور کسی مرد کی طرح بھی نظر نہیں آتے، جس پر سوشل میڈیا پر بحث بھی چھڑ گئی۔
عمران عباس نے نہایت پُرسکون انداز میں جواب دیتے ہوئے کہا کہ لوگوں کی نفرت یا غیر ضروری تنقید سے انہیں کوئی فرق نہیں پڑتا کیونکہ اللہ نے انہیں ان کی سوچ سے بڑھ کر کامیابیاں دی ہیں۔ انہوں نے مزید کہا کہ نفرت بھی ایک پیکج کا حصہ ہے اور جو لوگ دوسروں سے نفرت کرتے ہیں، وہ خود کامیابیوں سے محروم رہ جاتے ہیں۔
اداکار نے سوشل میڈیا پر نفرت انگیز تبصرے کرنے والوں پر بھی تنقید کی اور کہا کہ ایسے افراد کی اپنی زندگی میں کوئی خاص کامیابی نہیں ہوتی، یہی محرومیاں انہیں دوسروں پر تنقید کرنے پر مجبور کرتی ہیں۔ عمران عباس نے کہا کہ پیشہ ورانہ طور پر بھی جو لوگ دوسروں کو نیچا دکھانے کی کوشش کرتے ہیں، وہ خود پیچھے رہ جاتے ہیں۔
عمران عباس نے آخر میں دعا کے ساتھ کہا کہ اللہ انہیں ہدایت دے، اور ہم صرف دعا ہی کر سکتے ہیں۔
