کراچی، پاکستانی ڈرامہ انڈسٹری کے مشہور اداکار حمزہ علی عباسی کی جانب سے ٹک ٹاکر رجب بٹ کے تنازع پر ایک دلچسپ تجویز پیش کی گئی ہے۔
معروف اداکار کی جانب سے ایک پوڈکاسٹ میں بطور مہمان شرکت کرتے ہوئے مذہب، روحانیت اور موجودہ سماجی رویوں پر کھل کر گفتگو کرتے ہوئے رجب بٹ کے متنازعہ مقدمے پر ایک اہم حل پیش کیا گیا ہے۔
حمزہ علی عباسی کا کہنا ہے کہ ہمارے معاشرے میں اکثر ایسا ہوتا ہے کہ کوئی بیان دیا جاتا ہے، جسے یا تو غلط سمجھ لیا جاتا ہے یا ناسمجھی میں کچھ کہا جاتا ہے، جس کے باعث ہنگامہ کھڑا ہو جاتا ہے، حالیہ دنوں میں یہی کچھ یوٹیوبر رجب بٹ کے ساتھ ہوا، جس کے بعد انہیں ملک چھوڑنے پر مجبور ہونا پڑا۔
حمزہ علی عباسی نے اس صورتحال کا حل تجویز کرتے ہوئے کہا کہ عوام کو اپنے بیانات میں احتیاط برتنی چاہیے اور غیر ضروری باتوں سے بچنا چاہیے، تاہم مذہبی طبقے کو بھی نرمی اور درگزر کا رویہ اپنانا چاہیے۔
اداکار نے اس بات پر زور دیا ہے کہ اگر کوئی اپنی غلطی تسلیم کرے اور معذرت پیش کرے تو اسے معاف کر دینا چاہیے، اس معاملے کو طول دینے کے بجائے اسے ختم کر دینا ہی بہترین حل ہے۔
یاد رہے کہ ٹک ٹاکر رجب بٹ کی جانب سے ایک متنازع ویڈیو اپلوڈ کی گئی، جسکے بعد پاکستان کی عوام بالخصوص مذہبی حلقوں میں کہرام مچ گیا۔
