معروف گلوکارہ اور سماجی کارکن حدیقہ کیانی نے الخدمت فاؤنڈیشن کے تعاون سے جنوبی پنجاب کے سیلاب سے متاثرہ علاقوں میں بڑا ریلیف آپریشن مکمل کیا۔ اس مشن کے تحت جلال پور پیر والا اور شجاع آباد کے ایک ہزار متاثرہ خاندانوں میں ضروری امدادی اشیاء تقسیم کی گئیں۔
ریلیف پیکجز میں خشک راشن، بستر، لحاف، واٹر کولر، مچھر دانیاں، چٹائیاں، برتن اور گھریلو استعمال کی دیگر اشیاء شامل تھیں۔ اس کے علاوہ 500 بچوں کے لیے خصوصی طور پر اسٹیشنری، کھلونے اور تحائف فراہم کیے گئے۔ جلال پور پیر والا میں 600 جبکہ شجاع آباد میں 400 خاندانوں کو امداد دی گئی۔
اس موقع پر حدیقہ کیانی نے مقامی خواتین اور بچوں سے ملاقات کی اور ان کے مسائل سنے۔ انہوں نے کہا کہ سیلاب ایک بڑا انسانی المیہ ہے اور اس کے اثرات ابھی تک محسوس کیے جا رہے ہیں۔ ان کا کہنا تھا کہ الخدمت فاؤنڈیشن کی منظم اور مؤثر کوششیں قابل تحسین ہیں، اور وہ چاہتی ہیں کہ ان علاقوں میں ڈیزاسٹر مینجمنٹ سینٹرز قائم کیے جائیں تاکہ مستقبل میں ایسے سانحات سے نمٹنے میں آسانی ہو۔
ریلیف تقریب میں الخدمت فاؤنڈیشن ملتان کے صدر سید عبدالقادر، میڈیا ریلیشنز کے سینئر منیجر شعیب ہاشمی، جلال پور کے صدر عدیل کریم بھٹی اور شجاع آباد کے صدر ڈاکٹر ذیشان حسن وینس سمیت الخدمت کے رضاکاروں، مقامی رہنماؤں اور متاثرہ خاندانوں کی بڑی تعداد موجود تھی۔
سیلاب متاثرین کو 17 اکتوبر سے امدادی چیک جاری کرنے کی منظوری
الخدمت فاؤنڈیشن کے رہنماؤں نے کہا کہ ادارہ صرف فوری ریلیف تک محدود نہیں بلکہ متاثرہ خاندانوں کی مکمل بحالی تک ساتھ دے گا۔ جلد ہی کسان بحالی پروگرام کا آغاز بھی کیا جائے گا تاکہ معیشت کی بحالی ممکن ہو۔
بعد ازاں حدیقہ کیانی نے بستی بھوپت والا کا دورہ کیا، جہاں انہوں نے متاثرہ افراد سے ہمدردی کا اظہار کیا اور بچوں و نوجوانوں کو مخاطب کرتے ہوئے کہا: "آپ سب ’بنو قابل‘ جیسے پروگراموں میں شامل ہوں، ہنر سیکھیں اور اپنی زندگی کو بہتر بنائیں۔”
یہ ریلیف مشن نہ صرف فوری امداد کا ذریعہ تھا بلکہ ایک مثبت سماجی پیغام بھی تھا کہ اگر فنکار اور سماجی ادارے مل کر کام کریں تو بڑے سے بڑے چیلنج کا سامنا کیا جا سکتا ہے۔
