پاکستانی سینئر اداکارہ غزالہ جاوید کے حالیہ بیان نے سوشل میڈیا پر نئی بحث چھیڑ دی ہے۔ ایک نجی ٹی وی شو میں گفتگو کرتے ہوئے اداکارہ نے کہا کہ آج کی دور کی لڑکیاں شادی سے گریزاں ہیں کیونکہ وہ "آزادی اور عیاشی کی زندگی” گزارنا چاہتی ہیں۔
اداکارہ کے مطابق نئی نسل کی خواتین چاہتی ہیں کہ ان کی زندگی میں کوئی روک ٹوک یا جواب طلبی نہ ہو۔ انہوں نے کہا کہ ’’پہلے کے زمانے میں کم عمر لڑکیوں کی شادیاں زیادہ کامیاب ہوتی تھیں، کیونکہ ان میں برداشت، صبر اور خاندانی نظام کا احترام زیادہ ہوتا تھا۔‘‘
غزالہ جاوید نے دورانِ گفتگو اپنے بھانجے کی مثال بھی دی، جنہوں نے شادی کے لیے کسی ڈاکٹر یا انجینئر کے بجائے ایک عام گریجویٹ لڑکی کو ترجیح دینے کی خواہش ظاہر کی۔
اداکارہ کے اس بیان پر سوشل میڈیا پر سخت ردعمل دیکھنے میں آیا۔ متعدد صارفین نے انہیں "قدامت پسند سوچ” پر تنقید کا نشانہ بنایا۔ ایک خاتون صارف نے لکھا، "دنیا کہاں جا رہی ہے اور ان آنٹی کی باتیں دیکھو۔”
معروف ٹک ٹاکر اور ماڈل رومیسا سعید ٹریفک حادثے میں انتقال کرگئیں
ایک اور صارف بسمہ نے طنز کرتے ہوئے کہا، "اسی لیے مردوں کو شادی سے کوئی مسئلہ نہیں، کیونکہ شادی کے بعد بھی ان سے کوئی سوال نہیں کرتا۔”
کئی صارفین نے اداکارہ کے اس خیال سے اختلاف کرتے ہوئے لکھا کہ "کم عمر شادیاں کامیاب نہیں ہوتیں بلکہ ایسی لڑکیاں عمر بھر دباؤ میں رہتی ہیں کیونکہ ان کے پاس نہ تعلیم تھی، نہ فیصلہ سازی کی آزادی۔”
اداکارہ غزالہ جاوید کے اس بیان نے سماجی حلقوں میں شادی، خواتین کی خودمختاری اور روایتی خاندانی اقدار پر ایک نئی بحث کو جنم دے دیا ہے۔
