کراچی: پاکستانی سپر اسٹارز ماہرہ خان اور فواد خان نے جیو پوڈکاسٹ میں اپنی نئی فلم "نیلوفر” کی نمائش کے حوالے سے دلچسپ گفتگو کی اور فواد خان کی پرانی وائرل تصویر کی حقیقت سے متعلق بھی بات کی۔
میزبان نے فواد خان سے 1998 میں کھینچی گئی ان کی وائرل تصویر کے بارے میں سوال کیا، جس میں وہ آٹھویں جماعت کے طالب علم تھے اور تصویر پر انہوں نے لکھا تھا: "محنت کرو جب تک تمہارا نام کتابوں میں نہ آجائے”۔
اس پر فواد خان نے وضاحت دیتے ہوئے کہا کہ اس تصویر کے پیچھے دلچسپ کہانی ہے، جب کلاس کے بچوں کی تصاویر لی جا رہی تھیں تو ہر بچے کو اپنا کوئی یادگار پیغام لکھنا تھا۔ انہوں نے بتایا کہ اس وقت کوئی سوشل میڈیا نہیں تھا، اس لیے وہ فلم کے ایک اقتباس سے متاثر ہو کر یہ الفاظ لکھے جو ان کے لیے یادگار بن گئے۔
جیو پوڈکاسٹ میں ماہرہ خان نے بھی گفتگو کرتے ہوئے کہا کہ جب بھی کوئی فلم ریلیز ہونے والی ہوتی ہے تو دباؤ ضرور محسوس ہوتا ہے، لیکن ہمیشہ یقین ہوتا ہے کہ فلم اچھی رہے گی کیونکہ محنت پہلے ہی کی جا چکی ہوتی ہے۔
