ضلع کچہری لاہور میں جوا ایپس کی غیر قانونی پروموشن کے مقدمے میں اہم پیشرفت سامنے آئی ہے۔
جوڈیشل مجسٹریٹ نعیم وٹو کیس کی سماعت کی، جس میں یوٹیوبر سعد الرحمان عرف ڈکی بھائی اور ان کی اہلیہ عروب جتوئی عدالت کے روبرو پیش ہوئے۔
عدالت نے ڈکی بھائی کے شریک ملزم سبحان کی بریت کی درخواست خارج کر دی۔ سماعت کے دوران عدالت نے ڈکی بھائی سمیت دیگر ملزمان کے خلاف کیس کی سماعت 17 دسمبر تک ملتوی کرتے ہوئے ملزمان کو فرد جرم کے لیے آئندہ سماعت پر طلب کر لیا۔
ڈکی بھائی نے عدالت میں بتایا کہ سبحان نے ان کی گرفتاری سے تین ماہ قبل ان کے ساتھ ملازمت شروع کی تھی اور وہ ایک لاکھ روپے تنخواہ پر نوکری کر رہا ہے، لہٰذا اس کا کیس سے کوئی تعلق نہیں ہے۔
عدالت نے استفسار کیا کہ عروب جتوئی کی قبل از گرفتاری ضمانت ہو چکی ہے؟ وکیل نے جواب دیا کہ جی، عروب کی ضمانت ہو چکی ہے۔
عدالت نے مزید پوچھا کہ اس مقدمہ میں کون سی درخواست دی گئی ہے، جس پر ڈکی بھائی کے وکیل نے بتایا کہ یہ سپرداری کی درخواست ہے، جس میں الیکٹرانک ڈیوائسز اور موبائل این سی سی آئی اے کے پاس ہیں، اور ہمارے چار کریڈٹ کارڈ اور رقم ہمارے حوالے کی جائیں۔
واضح رہے کہ مذکورہ کیس میں ڈکی بھائی دو روز قبل ضمانت پر رہا ہوئے تھے، اور ملزمان کے خلاف این سی سی آئی اے نے مقدمہ درج کیا ہوا ہے۔
