دبئی: بالی ووڈ کے سپر اسٹار شاہ رخ خان کے نام سے بننے والا شاہ رخ ٹاور لانچ کے پہلے ہی دن مکمل طور پر فروخت ہو گیا۔ دبئی کی مصروف ترین شاہراہ شیخ زاید روڈ پر تعمیر ہونے والے اس ٹاور کی کل مالیت 2.1 ارب درہم (تقریباً 159 ارب 60 کروڑ پاکستانی روپے) ہے۔
شاہ رخ ٹاور کی لانچنگ تقریب دبئی ایکسپو سٹی میں منعقد ہوئی، جس میں شاہ رخ خان کے علاوہ 6 ہزار سے زائد مہمان شریک ہوئے۔ اس موقع پر شاہ رخ خان نے کہا کہ یہ ٹاور عالمی معیار کی سہولتوں اور جدید ڈیزائن سے مزین ہوگا اور شیخ زاید روڈ پر ایک ممتاز تجارتی مرکز کے طور پر ابھرے گا۔
رپورٹس کے مطابق، منصوبے کی تکمیل کا ہدف سال 2029 تک ہے۔ ٹاور میں جدید دفاتر، شاپنگ زونز اور دیگر تجارتی سہولتیں شامل ہوں گی، جن سے نہ صرف دبئی بلکہ بین الاقوامی سرمایہ کار بھی مستفید ہوں گے۔
شاہ رخ خان کے نام سے منسوب یہ ٹاور دبئی کی اسکائی لائن میں ایک نمایاں اضافہ ثابت ہوگا اور شہر کے تجارتی اور سرمایہ کاری کے منظرنامے کو مضبوط کرنے میں اہم کردار ادا کرے گا۔
