کراچی: پاکستان کے معروف کامیڈین ولی شیخ کو اس وقت شدید مالی اور ذاتی نقصان کا سامنا کرنا پڑا جب ان کی ذاتی گاڑی دن دیہاڑے ان کے گھر کے باہر سے چوری کر لی گئی۔
اپنے فیس بک ویڈیو پیغام میں ولی شیخ نے بتایا کہ واقعہ 30 ستمبر بروز منگل دوپہر 3:30 سے 4 بجے کے درمیان کراچی کے علاقے ملیر، معین آباد فیز 3 میں پیش آیا۔ ان کے مطابق، سفید اور سیاہ رنگ کی گاڑی ان کے گھر کے باہر کھڑی تھی، جہاں سے نامعلوم افراد نے اسے چوری کر لیا۔
کامیڈین نے انکشاف کیا کہ واقعے کی اطلاع فوری طور پر ہیلپ لائن 15 پر دی گئی، لیکن کئی گھنٹوں تک کسی قسم کا جواب نہیں ملا۔ بعد ازاں، وہ خود متعلقہ تھانے پہنچے جہاں پولیس نے ان کی شکایت پر فوری کارروائی کا یقین دلایا اور مناسب رویہ اختیار کیا۔
ولی شیخ نے اپنی ویڈیو میں سندھ حکومت، محکمہ پولیس، اور دیگر متعلقہ اداروں سے اپیل کی کہ ان کی چوری شدہ گاڑی کو جلد از جلد تلاش کر کے واپس کیا جائے، کیونکہ وہ ایک محنت کش فنکار ہیں جنہوں نے بڑی مشکل سے رقم جمع کر کے گاڑی خریدی تھی۔
انہوں نے مجرموں کے خلاف سخت کارروائی کا مطالبہ کرتے ہوئے کہا کہ ایسے واقعات فنکاروں کے لیے نہ صرف معاشی دھچکا ہوتے ہیں بلکہ ذہنی اذیت کا باعث بھی بنتے ہیں۔
آخر میں، ولی شیخ نے اپنے مداحوں سے درخواست کی کہ وہ ان کا ساتھ دیتے ہوئے اس ویڈیو کو زیادہ سے زیادہ شیئر کریں تاکہ متعلقہ اداروں تک ان کی آواز پہنچ سکے اور انہیں انصاف مل سکے۔
