بالی ووڈ کی مشہور فلم "تھری ایڈیٹس” کے معروف اداکار اچیوٹ پوٹدار 91 برس کی عمر میں ممبئی میں انتقال کر گئے۔
اداکار نے اس بلاک بسٹر فلم میں سخت مزاج پروفیسر کا کردار ادا کیا تھا، جس کا مشہور ڈائیلاگ "ارے کہنا کیا چاہتے ہو؟” آج بھی مداحوں کے ذہنوں میں زندہ ہے اور اس پر بے شمار میمز بھی بنائی گئی تھیں۔
بھارتی میڈیا رپورٹس کے مطابق، اچیوٹ پوٹدار کو طبی مسائل کے باعث جیوپیٹر اسپتال میں داخل کیا گیا تھا، لیکن وہ صحتیاب نہ ہو سکے۔ ان کی موت کی درست وجہ سامنے نہیں آئی، تاہم ان کی عمر رسیدگی سے جُڑی پیچیدگیوں کو ممکنہ سبب قرار دیا جا رہا ہے۔ ان کی آخری رسومات منگل کو ممبئی میں ادا کی جائیں گی۔
اچیوٹ پوٹدار نے فلمی کیریئر کے دوران ہندی اور مراٹھی زبانوں میں 125 سے زائد فلموں میں کام کیا۔ ان کی نمایاں فلموں میں "آکروش”، "اردھ ستیہ”، "تیزاب”، "راجو بن گیا جینٹل مین”، "دل والے”، "یہ دلّگی”، "رنگیلا”، "مہرتی دند”، "یشونت”، "عشق”، "واستو”، "آ اب لوٹ چلیں”، "ہم ساتھ ساتھ ہیں” اور "پرندہ” شامل ہیں۔ مگر "تھری ایڈیٹس” میں ان کا کردار سب سے زیادہ پہچانا جاتا ہے۔
اداکار نے فلمی دنیا کے علاوہ بھارتی ٹیلی ویژن پر بھی گہرا اثر چھوڑا۔ "واگلے کی دنیا” اور "بھارت کی کھوج” جیسے مقبول ڈراموں میں ان کی اداکاری کو خوب سراہا گیا۔ ان کے انتقال کی خبر نے فلمی حلقوں اور مداحوں میں غم کی لہر دوڑا دی ہے۔ انہیں ایک مخلص، محنتی اور نرم دل فنکار کے طور پر یاد کیا جا رہا ہے جنہوں نے اپنی اداکاری سے ہمیشہ کے لیے اپنی جگہ بنا لی۔
