بالی ووڈ اداکار اور پروڈیوسر اجے دیوگن نے ماضی کا یادگار قصہ سناتے ہوئے یہ انکشاف کیا ہے کہ ایک مرتبہ انہوں نے حسین اداکارہ مادھوری ڈکشت کو دیکھتے ہوئے سگریٹ منہ پر لگالی تھی۔
خوبصورت مسکراہٹ والی بالی ووڈ حسینہ مادھوری کے مداح نہ صرف عام لوگ بلکہ ساتھی اداکار بھی ہیں جس بات کا اندازہ اجے دیوگن کے انکشاف سے باخوبی لگایا جاسکتا ہے۔
2019 میں فلم ٹوٹل دھمال کے تشہیر کے لیے دیے گئے ایک انٹرویو میں اجے نے 2001 کا ایک دلچسپ قصہ سنایا، فلم ’یہ راستے ہیں پیار کے‘ جس کے مرکزی کرداروں میں مادھوری اور اجے سمیت پریتی زنٹا بھی شامل تھیں۔
اداکار کی جانب سے ہنستے ہوئے بتایا گیا کہ 2001 میں اس فلم کی شوٹنگ شروع ہونی تھی اور ہم سب ایک کمرے میں بیٹھے تھے، اس وقت میں جوس اور ساتھ میں سگریٹ پی رہا تھا۔
اجے کا کہنا تھا کہ اتنے میں مادھوری ڈکشت کمرے میں داخل ہوئیں، میں نے جب انہیں دیکھا تو دیکھتا ہی رہ گیا، وہ اتنی حسین تھیں کہ ان کے آنے سے کمرے کا ماحول ہی بدل گیا، میں نے سگریٹ پینے کے بجائے، الٹا اپنے منہ پر لگا لیا۔
گفتگو کے دوران مادھوری سمیت اجے دیوگن نے سب کو اپنے چہرے پر سگریٹ سے پڑے نشان کو دیکھایا گیا۔
معروف اداکار کا کہنا تھا کہ یہ بھی دیکھیں کہ مادھوری کا نشان آج بھی میرے چہرے پر ہے، میں اسے مادھوری ڈکشت کا نشان کہتا ہوں، جس پر اداکارہ سمیت دیگر فنکاروں نے زور زور سے قہقے لگانے شروع کردیے۔
