لاہور، پاکستان شوبز انڈسٹری کی مشہور اور سینئر اداکارہ صبا فیصل کا کہنا ہے کہ لڑکیوں کو سمجھدار ہونے کے بعد لیکن خود مختار ہونے سے پہلے شادی کر لینی چاہیے۔
حال ہی میں خو برو اداکارہ صبا فیصل ایک پوڈ کاسٹ میں شریک ہوئیں، جہاں انہوں نے اپنی بہوؤں سے تعلقات اور بطور ساس ماضی کی غلطیوں سمیت مختلف امور پر اپنے تاثرات کا اظہار کیا۔
اداکارہ نے کہا کہ میں اپنی دونوں بہوؤں سے بہت پیار کرتی ہوں، میں نیہا اور نیشا دونوں کیساتھ تصاویر پوسٹ کرتی ہوں، دراصل میری چھوٹی بہو کو مداح بہت پسند کرتے ہیں۔
صبا فیصل کا کہنا تھا کہ شاید اس کے حجاب کے انداز یا اس کے نرم بولنے کے باعث، اس کی تصاویر ہمیشہ وائرل ہوتی رہتی ہیں۔
غیر شادی شدہ لڑکیوں کو مشورہ دیتی ہوں کہ انہیں صحیح عمر میں شادی کر لینی چاہیے، میں 20 سال کی عمر میں شادی کے حق میں نہیں، لیکن شادی کی 30 سال عمر بھی بہت زیادہ ہے۔
صبا فیصل کا کہنا تھا کہ اس عمر میں لڑکیوں کی سمجھوتہ کرنے کی عادت ختم ہو جاتی ہے، انکا ذہن پختہ ہوجاتا کیونکہ وہ سمجھتی ہیں کہ انہیں اب کسی سہارے کی ضرورت نہیں ہے جبکہ کسی بھی رشتے کا انحصار سمجھوتے پر ہی ہوتا ہے۔
