ریجنل پولیس آفیسر گوجرانوالہ خرم شہزاد حیدر نے ضلع گجرات کا اہم دورہ کیا۔ پولیس لائن پہنچنے پر انہیں چاق و چوبند دستے نے سلامی پیش کی۔ بعد ازاں آر پی او نے یادگارِ شہداء پر پھولوں کا گلدستہ رکھ کر شہداء کی عظیم قربانیوں کو خراجِ عقیدت پیش کیا۔
دورے کے دوران خرم شہزاد حیدر نے علما کرام اور کرسچن کمیونٹی کے نمائندگان سے ملاقاتیں کیں، جن میں بین المذاہب ہم آہنگی، امن و امان اور سماجی استحکام کے اہم امور پر تفصیلی تبادلہ خیال ہوا۔ اسی سلسلے میں انہوں نے SDPOs اور SHOs کے ساتھ میٹنگ کی اور ضلع میں امن و امان کی صورتحال، پولیس کارکردگی اور عوامی خدمات کی فراہمی سے متعلق بریفنگ لی۔
آر پی او نے ٹریفک سٹاف کے ساتھ خصوصی اجلاس میں ٹریفک مینجمنٹ، حادثات کی روک تھام اور مؤثر حکمت عملی کے حوالے سے واضح ہدایات جاری کیں۔ اس کے علاوہ انہوں نے سیف سٹی گجرات کا دورہ بھی کیا، جہاں ڈیوٹی پر موجود افسران نے جدید مانیٹرنگ سسٹمز اور آپریشنل ورکنگ کے بارے میں تفصیلی بریفنگ دی۔
بعد ازاں ڈی پی او کمپلیکس میں کھلی کچہری منعقد کی گئی، جس میں آر پی او نے عوامی مسائل براہِ راست سنے اور متعلقہ افسران کو فوری، مؤثر اور شفاف کارروائی کے احکامات جاری کیے۔
دورے کے اختتام پر پولیس لائن گجرات میں اجلاسِ عام سے خطاب کرتے ہوئے خرم شہزاد حیدر نے پولیس افسران و ملازمین کو نظم و ضبط، پیشہ ورانہ معیار اور عوامی خدمت کے اہم نکات سے آگاہ کیا۔ انہوں نے کہا کہ پولیس کا بنیادی مقصد عوام کے تحفظ اور خدمت ہے، اور ہر افسر کو اسی جذبے کے تحت کام کرنا چاہیے۔
