لاہور: پنجاب اسمبلی میں مبینہ غیر قانونی بھرتیوں کے مقدمے میں اہم پیش رفت سامنے آئی ہے۔ اینٹی کرپشن عدالت لاہور نے سابق وزیراعلیٰ پنجاب چودھری پرویز الہٰی سمیت دیگر ملزمان پر فردِ جرم عائد کرنے کا فیصلہ کرلیا ہے۔
نجی ٹی وی دنیا نیوز کے مطابق عدالت نے پرویز الہٰی اور شریک ملزمان کو 6 نومبر کو فردِ جرم کے لیے طلب کرلیا ہے، جب کہ شریک ملزمان کی بریت کی درخواستوں پر دلائل بھی اسی روز طلب کیے گئے ہیں۔
اینٹی کرپشن عدالت کے جج جاوید اقبال وڑائچ نے گزشتہ سماعت کا تحریری حکم جاری کرتے ہوئے کہا کہ پرویز الہٰی کی ایک روزہ حاضری معافی کی درخواست پر پراسیکیوٹر نے اعتراض اٹھایا۔ پراسیکیوشن کے مطابق چودھری پرویز الہٰی گزشتہ سماعت پر بھی پیش نہیں ہوئے تھے۔
غیر قانونی بھرتیوں کا کیس: پرویز الٰہی اور محمد خان بھٹی کی حاضری معافی منظور
تحریری حکم میں مزید کہا گیا کہ چونکہ اس مقدمے میں ابھی تک فردِ جرم عائد نہیں ہوئی، اس لیے آئندہ سماعت پر تمام ملزمان کی حاضری یقینی بنائی جائے۔
