پنجاب اسمبلی میں میرٹ سے ہٹ کر بھرتیوں کے مقدمے میں سابق وزیراعلیٰ پنجاب چوہدری پرویز الٰہی پر فردِ جرم عائد نہ ہو سکی۔ اینٹی کرپشن عدالت نے کیس کی سماعت 10 ستمبر تک ملتوی کر دی۔
عدالت کے جج جاوید اقبال وڑائچ نے کیس کی سماعت کی، تاہم پرویز الٰہی کی عدم حاضری کے باعث فردِ جرم عائد نہ کی جا سکی۔ ان کے وکلا نے عدالت میں حاضری معافی کی درخواست دائر کرتے ہوئے مؤقف اپنایا کہ پرویز الٰہی علیل ہیں اور ڈاکٹرز نے مکمل آرام کا مشورہ دیا ہے۔
کیس کے شریک ملزم اور سابق پرنسپل سیکرٹری پنجاب اسمبلی محمد خان بھٹی عدالت میں پیش ہوئے، جبکہ دیگر ملزمان بھی حاضری کے لیے موجود تھے۔ شریک ملزم مختار احمد رانجھا کی جانب سے بریت کی درخواست جمع کرائی گئی ہے، جس پر عدالت آئندہ سماعت میں فیصلہ کرے گی۔
منی لانڈرنگ کیس: پرویز الہٰی کی عدم پیشی پر عدالت نے وارنٹ گرفتاری جاری کردیے
پرویز الٰہی اور دیگر پر الزام ہے کہ انہوں نے پنجاب اسمبلی میں قواعد و ضوابط اور میرٹ کی خلاف ورزی کرتے ہوئے غیر قانونی بھرتیاں کیں۔ مقدمے میں ان افراد کو بھی نامزد کیا گیا ہے جنہوں نے مبینہ طور پر میرٹ سے ہٹ کر ملازمتیں حاصل کیں۔
