ڈپٹی کمشنر نورالعین کی ہدایات پر گجرات میں یومِ آزادی کے لیے تقریبات، شجرکاری، ثقافتی و تعلیمی سرگرمیوں کا جامع پلان تیار کر لیا گیا۔
گجرات: پاکستان کے 77ویں یومِ آزادی کے موقع پر ضلعی انتظامیہ گجرات نے 14 اگست کو شایانِ شان انداز میں منانے کے لیے بھرپور تیاریاں شروع کر دی ہیں۔
ڈپٹی کمشنر گجرات نورالعین کی خصوصی ہدایات پر ایڈیشنل ڈپٹی کمشنر جنرل افضال حیات تارڑ کی زیرِ صدارت ایک اہم اجلاس منعقد ہوا، جس میں ضلع بھر میں جشنِ آزادی سے متعلق تقریبات کے انتظامات کا تفصیلی جائزہ لیا گیا۔
اجلاس میں بتایا گیا کہ ضلعی و تحصیل ہیڈکوارٹرز پر پرچم کشائی کی پروقار تقاریب منعقد ہوں گی، جبکہ تمام سرکاری عمارتوں کو سبز و سفید روشنیوں سے سجایا جائے گا اور ہر عمارت پر قومی پرچم لہرانے کو یقینی بنایا جائے گا۔
محکمہ جنگلات نے یکم سے 14 اگست تک ہزاروں پودے لگانے کا اعلان کیا ہے تاکہ جشنِ آزادی کو شجرکاری مہم سے جوڑ کر ماحولیاتی بہتری کا پیغام بھی دیا جا سکے۔
اسکول ایجوکیشن، ہائر ایجوکیشن، اسپورٹس ڈیپارٹمنٹ اور دیگر ادارے یومِ آزادی کے حوالے سے ملی نغموں، تقریری مقابلوں، ثقافتی سرگرمیوں اور کھیلوں کے ایونٹس کا انعقاد کریں گے۔ ان تقریبات کا مقصد نوجوان نسل کو تحریکِ آزادی کی جدوجہد اور قومی تشخص سے روشناس کرانا ہے۔
اجلاس میں اسسٹنٹ کمشنر کھاریاں احمد شیر، اسسٹنٹ کمشنر سرائے عالمگیر فاروق اعظم، ضلعی افسران اور مختلف محکموں کے نمائندگان نے شرکت کی۔ اجلاس کے اختتام پر ایڈیشنل ڈپٹی کمشنر جنرل افضال حیات تارڑ نے تمام محکموں کو ہدایت کی کہ یومِ آزادی کی تقریبات کے لیے مربوط، منظم اور قومی جذبے سے بھرپور حکمتِ عملی اختیار کی جائے تاکہ 14 اگست کا دن یادگار اور مثالی طور پر منایا جا سکے۔
یاد رہے کہ ہر سال 14 اگست کو ملک بھر میں یومِ آزادی کی تقریبات جوش و خروش سے منائی جاتی ہیں اور اس بار گجرات کی ضلعی انتظامیہ نے عوامی شمولیت اور قومی شعور کو اجاگر کرنے کے لیے خصوصی تیاریوں کا فیصلہ کیا ہے۔
