گجرات کے حسن چوک اور ہریاوالہ میں خواتین سے پرس چھیننے کی وارداتیں، راہزن نقدی اور موبائل لے اُڑے، پولیس تاحال بے خبر۔
گجرات، شہر میں راہزنی اور چھینا چھپٹی کی وارداتیں روز بروز بڑھتی جا رہی ہیں۔ تازہ ترین واقعات میں دو خواتین کو نشانہ بنایا گیا جن سے قیمتی سامان اور نقدی چھین لی گئی۔
پہلا واقعہ گجرات کے مصروف علاقے حسن چوک میں پیش آیا، جہاں ایک غیر مسلح راہزن نے خاتون کا تعاقب کرتے ہوئے موقع دیکھ کر اچانک جھپٹا مارا اور اس کا پرس چھین کر فرار ہو گیا۔ متاثرہ خاتون کے مطابق پرس میں 50 ہزار روپے نقدی اور ایک موبائل فون موجود تھا۔ واردات اتنی تیزی سے ہوئی کہ آس پاس کے لوگ کچھ نہ کر سکے اور ملزم باآسانی فرار ہو گیا۔
دوسری واردات ہریاوالہ میں پیش آئی، جہاں ایک اور خاتون کو نشانہ بنایا گیا۔ نامعلوم شخص نے پرس چھین کر راہ فرار اختیار کی، تاہم ابتدائی رپورٹ کے مطابق اس پرس میں بھی نقد رقم اور ذاتی اشیاء موجود تھیں۔
گجرات میں گھر سے 32 سالہ خاتون کی لاش برآمد
ان دونوں واقعات کے بعد شہری حلقوں میں شدید بے چینی پائی جاتی ہے اور عوام نے پولیس سے گشت اور سیکیورٹی اقدامات بڑھانے کا مطالبہ کیا ہے۔
یاد رہے کہ گجرات میں حالیہ دنوں میں اس قسم کی وارداتیں بڑھ رہی ہیں، اور تاحال پولیس کسی بھی بڑے گروہ یا ملزم کو گرفتار کرنے میں کامیاب نہیں ہو سکی۔ مقامی افراد کا کہنا ہے کہ اگر پولیس نے فوری اقدامات نہ کیے تو جرائم کی شرح مزید بڑھ سکتی ہے۔
