شدید بارشوں کے باعث ڈسٹرکٹ جیل گجرات اور سیشن کورٹ کے احاطے میں پانی داخل ہو گیا، جس کے بعد حفاظتی اقدامات کے تحت 170 قیدیوں کو دیگر جیلوں میں منتقل کر دیا گیا ہے۔
جیل انتظامیہ کے مطابق 100 قیدی جن پر قتل اور سزائے موت کے مقدمات ہیں، انہیں لاہور جیل منتقل کیا گیا، جب کہ 70 خواتین قیدیوں کو گوجرانوالہ جیل بھیج دیا گیا ہے۔
مزید بتایا گیا ہے کہ جیل میں موجود 1000 قیدیوں کو پرانی بیرکوں سے نئی بیرکوں میں منتقل کر دیا گیا ہے تاکہ انہیں بارش کے پانی سے محفوظ رکھا جا سکے۔ اس وقت جیل میں تقریباً 1500 قیدی موجود ہیں، جبکہ پانچ روز قبل 200 قیدیوں کو جہلم جیل بھی منتقل کیا گیا تھا۔
جیل ذرائع کے مطابق گزشتہ سات روز سے قیدیوں کو عدالتوں میں پیش کرنے کی اجازت بھی معطل ہے، جس کی بنیادی وجہ انتظامی مشکلات اور خراب موسم بتایا جا رہا ہے۔
شدید بارشوں کے باعث پیدا ہونے والی اس ہنگامی صورت حال نے نہ صرف جیل انتظامیہ کی کارکردگی کو چیلنج کیا ہے بلکہ قیدیوں کی سیکیورٹی اور بنیادی سہولیات کی فراہمی پر بھی سوالات اٹھا دیے ہیں۔ حکام کا کہنا ہے کہ بارش تھمنے اور صورتحال بہتر ہونے تک مزید اقدامات کیے جا رہے ہیں تاکہ جیل کے اندرونی حالات قابو میں رہیں۔
