51
گجرات: وزیراعلیٰ پنجاب مریم نواز شریف کے وژن ’’ستھرا پنجاب‘‘ پر عملدرآمد کو یقینی بنانے کے لیے کمشنر گوجرانوالہ ڈویژن نوید حیدر شیرازی اور ڈپٹی کمشنر گجرات نوید احمد نے جی ٹی روڈ کا اچانک دورہ کیا، جہاں صفائی کی ناقص صورتحال پر شدید برہمی کا اظہار کیا گیا۔
معائنے کے دوران ٹائر مارکیٹ اور لاری اڈے کے اطراف صفائی کی صورتحال انتہائی خراب پائی گئی۔ گندگی اور کچرے کے ڈھیر دیکھ کر کمشنر نے چیف آفیسر میونسپل کارپوریشن خالق داد گاڑا کو ہدایت دی کہ کچرا پھینکنے میں ملوث 25 دکانوں کو فوری طور پر سیل کیا جائے اور ذمہ داروں کے خلاف سخت قانونی کارروائی کی جائے۔
کمشنر نوید حیدر شیرازی نے کہا کہ صفائی کے نظام میں کسی بھی قسم کی غفلت یا کوتاہی ہرگز برداشت نہیں کی جائے گی۔ ’’ستھرا پنجاب‘‘ مہم کے تحت زیرو ٹالرنس پالیسی اپنائی جا رہی ہے، اور جو بھی صفائی کے عمل میں رکاوٹ بنے گا، اسے قانون کے کٹہرے میں لایا جائے گا۔
انہوں نے شہریوں سے بھی اپیل کی کہ وہ صفائی کے عمل میں انتظامیہ کا ساتھ دیں اور اپنے اردگرد کے ماحول کو صاف رکھنے میں اپنا کردار ادا کریں۔
